2012թ. Միգրացիայի ծառայության համար ինտենսիվ աշխատանքի տարի է լինելու: Ծառայության ղեկավար Գագիկ Եգանյանն «Առաջին լրատվական»-ի հետ զրույցում հայտնեց, որ Միգրացիոն քաղաքականության հայեցակարգի իրականացումն ապահովող ծրագրում ներառված 145 գործողություններից 65-ը սկսվելու է 2012թ.-ին. «Փոքր ծառայության վրա բավականին լուրջ աշխատանքներ են դրված»:
Ըստ նրա`բազմաթիվ այլ նախձեռնություններ ևս կան: ԵՄ հետ համագործակցության առումով 10 պետություններ ստրագրեցին «Գործընկերություն հանուն շարժունակության հռչակագիրը», որը լայն պողոտաներ է բացում ԵՄ հետ, և 2012-ին սկսվելու է վերադարձողների վերաինտեգրման ծրագիրը: 2012-ին ԵՄ հետ վիզաների դյուրացման և միասնական համաձայնագիր կնքելու ուղղությամբ
բանակցությունները կսկսվեն, որը նոր խաղի կանոններ կսահմանի մեր քաղաքացիների համար, կկրճատվեն մուտքի արտոնագրի համար փաստաթղթերի ծավալն ու վճարների չափը: Սկսվում է նաև ԵՄ Թվինինգ ծրագիրը:
«Փորձում ենք նաև արտագաղթի ծավալները, պատճառները, մեկնելու երկրները ուսումնասիրել: Այդ խնդիրները պարզաբանելու համար դիմել ենք ՄԱԿ-ին, որ ուսումնասիրություն իրականացվի»,- ասաց Գ. Եգանյանը`հավելելով, որ արտագաղթի ծավալների մասին ռեալ տեղեկություն կունենանք, երբ մարդահամարի նախնական արդյունքները հրապարակվեն:
