ԱՄՆ արտոնագրային գերատեսչությունը դեկտեմբերի 29-ին հրապարակել է Apple ընկերության արտոնագրային դիմումը հետևյալ վերնագրով` «Դեմքերի ճանաչման ցածր շեմ» (Low Threshold Face Recognition): Այս մասին հայտնում է Patently Apple բլոգը:
Արտոնագրի հեղինակները առաջարկում են կիրառել դեմքերի ճանաչման գործառույթը նոթբուքերի և բջջային սարքավորումների համար: Օգտատերերին սարքավորումը «ճանաչելու է» առաջնային վահանակի տեսախցիկի օգնությամբ, ընդ որում՝ ինքնության ճանաչման «գործիք» կարող են ծառայել աչքերը, քիթը կամ բերանը, ինչպես նաև մաշկը:
Նախագծի առաձնահատկություններից մեկն այն է, որ սարքը պատրաստ է իր տիրոջը «ճանաչել» ամեն տեղ, նույնիսկ այն դեպքում, երբ էկրանն անջատված է:
Դիմումի մեջ նշվում է, որ սարքը կարող է պահել նաև որոշ օգտատերերի դեմքերը, օրինակ՝ մեկ տան անդամների կամ մեկ հյուրանոցի աշխատակիցների դեմքերը: Յուրաքանչյուրն ունենալու է սեփական ծրագիրն ու կարգավորումները, որ ներբեռնվում է այն բանից հետո, երբ սարքավորումը «ճանաչում է» նրան:
Դեմքերի ճանաչման տեխնոլոգիան կիրառվում է որոշ սարքավորումներում. այն օգտատերերին ազատում է գաղտնաբառը ներմուծելու անհրաժեշտությունից: Այդ սարքավորումներից մեկը Galaxy Nexus-ն է:
