Արաբական երկրների լիգայի դիտորդներն այսօր ժամանել են Սիրիայի Հոմս քաղաքը: Միաժամանակ քաղաքում անվտանգության ուժերի կողմից կրակոցներ են լսվել, ինչպես նաև սկսվել են լայնածավալ հակաիշխանական ցույցեր:
Դիտորդները ժամանել են Սիրիա գնահատելու համար, թե արդյո՞ք կառավարությունը ձեռնարկում է համապատասխան միջոցառումներ ցուցարարների նկատմամբ բռնությունը դադարեցնելու համար: Դիտորդների նպատակն է պահանջել, որ նախագահ Բաշար Ասադի ռազմական զորքերը հեռանան քաղաքներից, ազատ արձակվեն քաղբանտարկյալները և դադարեցվեն բոլոր տեսակի բռնությունները:
Դիտորդները ժամանել են հենց այն ժամանակ, երբ, ինչպես հայտնում են ընդդիմադիր ուժերը, Հոմս քաղաքում արդեն մի քանի օր է ռազմական պաշարում է տեղի ունենում: Սիրիայի տեղական համակարգող կոմիտեն հայտնել է, որ այսօր 35.000 ցուցարարներ են հավաքվել հարևան Խալիդիահ քաղաքում: Ցուցարարները հավաքվել են`իշխանությանը դատապարտելու նպատակով: Այլ համայնքներում նույնպես ցույցեր են սկսվել:
