ՀՀ պաշտպանության նախարարի առաջին տեղակալ Դավիթ Տոնոյանը դեկտեմբերի 26-ին հանդիպել է ԵԱՀԿ Երևանյան գրասենյակի պատվիրակությանը` գրասենյակի ղեկավարի պաշտոնակատար Կարել Հոֆստրայի գլխավորությամբ:
ՀՀ պաշտպանության նախարարության տեղեկատվության և հասարակայնության հետ կապերի վարչությունից «Առաջին լրատվական»-ին տեղեկացնում են, որ հանդիպման ընթացքում քննարկվել են անցնող տարվա ընթացքում համագործակցության արդյունքները:
Ընդգծվել է, որ տարին միանաշանակ կարելի է արդյունավետ և կառուցողական համարել: Մեծ ծավալի աշխատանք է կատարվել զինված ուժերում մարդու իրավունքների վերաբերյալ իրազեկության բարձրացման, զինված ուժերի ժողովրդավարական վերահսկողության մեխանիզմների զարգացման, զինված ուժերում հանցավորությանը նպաստող պատճառների վերհանման և այլ ուղղություններով:
Մասնավորապես, բարձր են գնահատվել ԵԱՀԿ Երևանյան գրասենյակի օժանդակությամբ հասարակական կազմակերպությունների ուժերով իրականացված զինվորական առաջնորդության, զինվորական կոլեկտիվների արդյունավետ ղեկավարման և հանցավորության պատճառների պարզաբանման, բանակ-հասարակություն կապերի ամրապնդման և այլ հիմնահարցերի ուսումնասիրությունները, «Զինված ուժերի անձնակազմի մարդու իրավունքների և հիմնարար ազատությունների մասին» ձեռնարկի հայերեն թարգմանությունը և զինված ուժերի ստորաբաժանումներում ու ռազմաուսումնական հաստատություններում մարդու իրավունքների վերաբերյալ դասախոսությունների շարքը:
Կողմերը համոզմունք են հայտնել, որ ձևավորված կառուցողական համագործակցության մթնոլորտը խորացման և ծավալման միտումներ ունի:
Հանդիպման վերջում ՀՀ պաշտպանության նախարարի առաջին տեղակալը և ԵԱՀԿ երևանյան գրասենյակի ղեկավարի պաշտոնակատարն ստորագրել են 2012թ. Համագործակցության ծրագիրը, որում մանրամասնորեն սահմանված են ԵԱՀԿ Երևանյան գրասենյակի գործառույթներից բխող և ՀՀ պաշտպանական բարեփոխումներին համապատասխանող ոլորտներում իրականացվելիք միջոցառումները` ռազմական հոգեբանության և սոցիոլոգիայի, սոցիոմետրիկուս ումնասիրությունների, մարդու իրավուքների, առաջնորդության, սոցիալական ապահովության, հետաքննության և նախաքննության մեթոդիկայի և մի շարք այլ ուղղություններով: