Les Nouvelles d’Armenie պարբերականի կայքը հայտնում է, որ Ֆրանսիայի Սենատի սոցիալիստական խմբի նախագահ Ֆրանսուա Ռեբսմանը դիմել է կառավարությանը` Հայոց ցեղասպանության ժխտումը քրեականացնող օրինագիծը Սենատի օրակարգում որքան հնարավոր է շուտ գրանցելու համար: Այս մասին տեղեկացնում է «Ազատություն» ռադիոկայանը:
«Նույնիսկ եթե կան կասկածներ օրինագծի ընտրական նկատառումներով ընդունված լինելու մասին, այսօր վատթարագույնը կլիներ այդ օրինագիծը թաղելը` առաջ բերելով հայկական համայնքի հիասթափությունը թուրքական համայնքի զայրույթը առաջացնելուց հետո»,- գրել է Ռեբսմանն այդ առթիվ հատուկ հաղորդագրությունում:
Ֆրանսիայի Ազգային ժողովի կողմից անցած հինգշաբթի ընդունված օրինագիծը (այն մեկ տարվա բանտարկություն և 45 հազար եվրոյի տուգանք է սահմանում Հայոց ցեղասպանության իրականությունը ժխտողների համար) վավերացվելու համար պետք է գրանցվի Սենատում և քննարկվի երեսփոխանական գործընթացի ավարտից առաջ` այսինքն նախքան փետրվարի վերջը:
Հայոց ցեղասպանության ժխտման համար պատիժ սահմանող օրինագծի հեղինակն է Վալերի Բուայեն:
Հայկական օրինագծի ընդունվելուց ի վեր` դրա հեղինակ պատգամավոը գտնվում է թուրքական սպառնալիքի տակ:
Ներխուժելով Վալերի Բուայեի կայքը` «Գորշ գայլեր» կազմակերպության անդամները բռնության, մինչև իսկ մահվան սպառնալիքներ է հնչեցրել Բուայեի և նրա ընտանիքի հասցեին: Այդ մասին վերջին օրերին տեղեկացնում է BFMTV հեռուստակայանը` ներկայացնելով սպառնալիքի հեղինակների Facebbook-յան էջը, որտեղ վերջիններս հպարտորեն հայտարարում են այդ մասին:
Իսկ Վ. Բուայեն այդ նույն հեռուստակայանին իր բողոքն է հայտարարել` իր ընտանիքի և իր անձի հանդեպ արված այս սպառնալիքների առնչությամբ:
Հայտնելով, որ պատրաստվում է բողոք ներկայացնել տեղի ունեցածի առնչությամբ` Բուայեն ընդգծել է. «Այնուհանդերձ, լիակատար պարադոքս է` լինել մարդու իրավունքներին, մարդկային արժանապատվությանը, ճանաչմանը և առավել թույլերի պաշտպանությանը վերաբերող տեքստի հեղինակն ու զեկուցողը և օրենսդրական գործունեությամբ զբաղվել սպառնալիքի տակ, օտարերկրյա պետության սպառնալիքի թիրախը դառնալ, իսկ այնուհետեւ ենթարկվել անձնական` ծայրաստիճան լուրջ սպառնալիքների։ Մահվան սպառնալիքներ, բռնության սպառնալիքներ, ոչնչացման սպառնալիքներ, վիրավորանքներ և հայհոյանքներ` սա ես անչափ վրդովեցուցիչ եմ համարում»։
«Նման գործելակերպը կարող է սոսկ մեկ անգամ ևս ամրապնդել մեզ մեր համոզմունքների և վճռականության մեջ», – հայտարարել է ֆրանսիացի պատգամավորը։
