Տարածաշրջանային հետազոտությունների հայկական կենտրոնի ղեկավար Ռիչարդ Կիրակոսյանն այսօր լրագրողների հետ հանդիպման ժամանակ ամփոփեց անցնող 2011-ը և իր դիտարկումները ներկայացրեց գալիք 2012-ին սպասվելիք զարգացումների շուրջ: Նա անցնող տարվա կարևոր գործընթաց համարեց երկխոսությունը և նշեց, որ Հայաստանը երկխոսության կարիք շատ ունի, բայց այդ երկխոսությունը պետք է լինի քաղաքական մակարդակով, ոչ թե անձերի:
Ներքաղաքական գործընթացներից Կիրակոսյանն առանձնացրեց ՀՀԿ-ԲՀԿ հակասությունները` նկատելով, որ քաղաքական էլիտայի միջև ներքին մրցակցություն կա, որն իրական է, ոչ թե իմիտացիոն: Նա նաև նշեց, որ արդեն իսկ պարզ է` ՀԱԿ-ը լինելու է ապագա խորհրդարանում, իսկ եթե ընտրություններն իրոք անցնեն ազատ և արդար, ապա ԲՀԿ-ն ԱԺ-ում մեծամասնություն չի ունենա:
Ըստ քաղաքագետի` 2012-ի ընտրությունները չափազանց կարևոր են, քանզի դրանք լինելու են առաջին համապետական ընտրությունները 2008-ի մարտի մեկից հետո, ավելին, ըստ նրա` հենց այդ ընտրություններն են որոշելու, թե ինչ Հայաստան ենք ունենալու ապագայում, և թե` 2012-ը կլինի ժողովրդավարությա՞ն, թե՞ օլիգարխների տարի:
Կիրակոսյանը բացասաբար գնահատեց 2011-ի տնտեսական քաղաքականությունը: Ըստ նրա` այն հանգամանքը, որ Հայաստանում աղքատությունն աճել է և դարձել 36 տոկոս, պետք է մտահոգի թե Հայաստանի իշխանություններին, թե սփյուռքահայերին: Կիրակոսյանը Հայաստանի համար լուրջ մարտահրավեր համարեց օլիգարխների գոյությունը, որոնք խոչընդոտում են Հայաստանում բիզնես-մրցակցությանը և արտաքին ներդրումներին:
Ըստ Կիրակոսյանի` 2012-ի բյուջեն մարտահրավեր է կառավարությանը, քանզի հայտարարած 101 մլն-ը պետք է հավաքեն օլիգարխներից, և դեռևս պարզ չէ, թե ով է հաղթելու` կառավարությո՞ւնը, թե՞ օլիգարխները:
Նա նաև հավելեց, որ 2012-ը հիմնականում ներքին զարգացումների տարի կլինի: