Տնտեսական ճգնաժամի մեջ հայտնված Եվրոպայում iPhone-ի վաճառքի չափերը զգալիորեն նվազել են: Այս մասին են վկայում Kantar Worldpanel ComTech ընկերության անցկացրած հետազոտության տվյալները:
Ինչպես հաղորդում է Reuters գործակալությունը, փորձագետներն այդ միտումը կապում են եվրոգոտու պարտքային ճգնաժամի հետ, որը հարվածել է սպառողների բյուջեին: Միևնույն ժամանակ, Apple-ի մրցակից մյուս ընկերությունների սմարթֆոնների գինը զգալիորեն նվազել է:
Նոր iPhone 4S-ը մեծ հետաքրքրություն առաջացրեց Մեծ Բրիտանիայի և ԱՄՆ-ի սպառողների շրջանում, սակայն եվրոպացիների ակտիվությունն արագ մարեց:
«Մեծ Բրիտանիայում, ԱՄՆ-ում և Ավստրալիայում Apple-ի նոր iPhone-ները շարունակում են գնել Ծննդյան տոների նախաշեմին: Սակայն նույնը չի կարելի ասել աշխարհի բոլոր երկրների մասին»,- նշել է սպառողների շուկայի վերլուծության մասնագետ Դոմինիկ Սաննեբոն:
Գործակալությունը նշում է, որ ԵՄ երկրները, փորձելով կրճատել բյուջեի ծախսերը, կրճատում են աշխատատեղերը, քնակչությունն ավելի աղքատ է դառնում, հետևաբար նրանք նախընտրում են ավելի էժան սարքեր գնել: Դրա հետ կապված մեծ մասսայականություն է ձեռք բերում Apple-ի գլխավոր մրցակից Google ընկերությունը: Վերջինիս օպերացիոն համակարգն օգտագործում են Samsung Electronics-ը, Sony Ericsson-ը, LG Ericsson-ը, Motorola Mobility-ն:
«Գերմանիայում վերջին 12 շաբաթների ընթացքում Android-ը կազմում է սմարթֆոնների ամբողջ վաճառքի 61%-ը»,- ասել է Սաննեբոն: