Լոռու մարզի ընդհանուր իրավասության դատարանի դատավոր Նաիրա Ավետիսյանը յուրօրինակ սովորություն ունի. «Ժողովուրդ» թերթի տեղեկություններով` տիկին դատավորն իր վարույթում գտնվող դատական նիստերը նշանակում է միայն հինգշաբթի եւ ուրբաթ օրերին:
Պարզվում է` դատավորի գործելաոճը հետաքրքիր խորհուրդ ունի. նա միայն այդ օրերին է այցելում Լոռու մարզի իր նստավայր, իսկ մյուս օրերին բնակվում Երևանում: Ու որպեսզի իրեն չծանրաբեռնի, դատաքննությունները մեկտեղում է այդ երկու օրերին: Թերթի թղթակիցը նշում է, որ այս տեղեկությունները ճշտել է, երբ այցելել է datalex.am պաշտոնական կայքը, որտեղ տեղադրված են ՀՀ բոլոր դատարաններում ընթացող գործերի քննությունների ժամկետները:
Թերթը նկատել է նաև, որ ՀՀ դատական օրենսգիրքը դատավորին պաշտոնանկ անելու հիմքերի մեջ սահմանում է աշխատանքի չներկայանալը: Բայց տիկին Ավետիսյանի վրա այդ դրույթը չի տարածվի, քանի դեռ նրա ամուսինը` Յուրան, աշխատում է ՀՀ զինդատախազությունում»,-գրում է թերթը:
