Դեկտեմբերի 21-ին լրանում է Անկախ պետությունների համագործակցության ստեղծման քսան տարին:
1991 թվականի դեկտեմբերի 8-ին Բելառուսում ՌԽՍԴՀ նախագահ Բորիս Ելցինը, Ուկրաինայի նախագահ Լեոնիդ Կրավչուկը և Բելառուսի Հանրապետության Գերագույն խորհրդի նախագահ Ստանիսլավ Շուշկևիչը ստորագրեցին ԽՍՀՄ-ի փլուզման և ԱՊՀ ստեղծման համաձայնագիրը:
Նույն թվականի դեկտեմբերի 21-ին Ալմաթիում ստորագրվեց Համաձայնագրի լրացուցիչ արձանագրությունը, որի համաձայն՝ Հայաստանի, Ադրբեջանի, Բելառուսի, Ղազախստանի, Ղրղզստանի, Մոլդովայի, Տաջիկստանի, Թուրքմենստանի, Ուզբեկստանի, Ուկրաինայի հանրապետությունները և Ռուսաստանի Դաշնությունը կազմում են Անկախ պետությունների համագործակցությունը:
Համագործակցության մեջ մտնում է ավելի քան 60 միջպետական կոորդինացնող և խորհրդատու մարմին, որոնցից հիմնականներն են պետությունների ղեկավարների խորհուրդը, կառավարության ղեկավարների խորհուրդը, ԱԳ նախարարների խորհուրդը, պաշտպանության նախարարների խորհուրդը, տնտեսական դատարանը, Միջպետական բանկը, Միջխորհրդարանական վեհաժողովը, գործադիր կոմիտեն: Համագործակցության շրջանակներում գործում են տարբեր միավորումներ` Ռուսաստանի և Բելառուսի միացյալ պետությունը, ԵՎՐԱԶԵՍ-ը, Միջինասիական տնտեսական ընկերակցությունը, Ժողովրդավարության և տնտեսական զարգացման կազմակերպությունը:
