Աշխարհում խոշորագույն Amazon ինտերնետ-խանութը մտադիր էր գնել BlackBerry սմարթֆոններ և PlayBook պլանշետներ արտադրող Research in Motion ընկերությունը, սակայն գործարքը չի կայացել:
Ինչպես հայտնում է Reuters գործակալությունը, անանուն աղբյուրները պատմել են, որ 2011 թվականի ամռանը Amazon ընկերությունը վարձակալել է ներդրումային բանկ, որը գնահատելու էր ձեռքբերման պոտենցիալը, ինչպես նաև RIM ղեկավարության հետ սկսելու էր նախնական բանակցությունները: Սակայն ընկերությունը գնելու առաջարկն այդպես էլ չի արվել:
The Wall Street Journal-ը փոխանցում է, որ BlackBerry-ի արտադրողին գնելու հնարավորությունը վերանայել են նաև Microsoft և Nokia ընկերությունները: Այս երեք ընկերությունների ղեկավարները պարբերաբար հանդիպել են բանակցություններ սկսելու համար, սակայն արդյունքների մասին տեղեկություններ չկան:
Գործակալության աղբյուրները չեն նշել, սակայն, թե ինչու գործարքը չի կայացել, սակայն ենթադրվում է, որ գնմանը դիմադրել է RIM-ը: Ընկերության տնօրենների խորհուրդը համարել է, որ այս փուլում RIM-ը վաճառելը նպատակահարման չէ, և ընկերությունը կարող է ճգնաժամը հաղթահարել իր ուժերով:
Խորհրդի անդամները իրենց հույս դնում են BlackBerry սմարթֆոնների վրա, որոնք թողարկվելու են 2012 թվականին:
RIM ընկերության կապիտալիզացիան ներկայումս գնահատվում է 6,8 միլիարդ դոլար: Վերջին 12 ամսվա ընթացքում ընկերության բաժնետոմսերը ընկել են 77 տոկոսով: 2011 թվականին RIM-ը վաճառքի էր հանել PlayBook պլանշետը, որը չի արդարացրել ընկերության ղեկավարության պահանջները, և նոր սարքավորումների թողարկման ժամկետը մի քանի անգամ տեղափոխվել է: