Ըստ ՀՊՃՀ–ի (Պոլիտեխնիկ) հասարակայնության հետ կապերի և տեղեկատվության բաժնի հաղորդագրության՝ դեկտեմբերի 21-ին Հայաստանի պետական ճարտարագիտական համալսարանի ռեկտորատի նիստերի դահլիճում տեղի կունենա ՀՊՃՀ–ի և «Ագրոսայնս» գիտա-արտադրական ՍՊԸ-ի միջև գիտատեխնիկական համագործակցության պայմանագրի ստորագրման արարողությունը:
Պայմանագրով նախատեսվում է ՀՊՃՀ Գիտական ստորաբաժանման ենթակառուցվածքում և Քիմիական տեխնոլոգիաների ու բնապահպանական ճարտարագիտության ֆակուլտետում հիմնել «Էկոլոգիապես անվտանգ գյուղատնտեսական նոր թունաքիմիկատների և պատրաստուկային ձևերի ստացման տեխնոլոգիայի մշակման և որակի վերահսկման» ժամանակակից լաբորատոր բազա, ինչպես նաև` իրականացնել համատեղ գիտա-ուսումնական ծրագրեր: Լաբորատորիան ունենալու է ՀՊՃՀ գիտա-ուսումնական ստորաբաժանման բազայի կարգավիճակ:
Նույն օրը տեղի կունենա նաև Ճարտարագիտական համալսարանի և «Microsoft» ընկերության հայաստանյան գրասենյակի միջև համատեղ կրթական ծրագրերի իրականացման վերաբերյալ հուշագրի կնքման պաշտոնական արարողությունը: Սույն հուշագրով ՀՊՃՀ-ն և «Microsoft» ընկերությունն ամրագրում են երկարատև համագործակցություն սկսելու վերաբերյալ իրենց պատրաստակամությունը, որի շրջանակներում նախատեսվում է ՀՊՃՀ-ում հիմնել «Microsoft» ընկերության IT ակադեմիա, կազմակերպել վերապատրաստման դասընթացներ, համալսարանում ներդնել ընկերության LIVE@EDU համակարգը: Համաձայն ստորագրվող հուշագրի՝ ճարտարագիտական համալսարանը հնարավորություն կստանա արտոնյալ պայմաններով ձեռք բերելու «Microsoft» ընկերության ծրագրային համակարգեր և տեղեկատվական միջոցներ:
