Հանրապետությունում բացի գրիպի թեթևակի աշխուժացումից, որևէ հիվանդության բարձրացում չունենք: Բոլորը օրինաչափորեն արձանագրվում են: Այս մասին «Առաջին լրատվական»-ի հետ զրույցում ասաց ՀՀ առողջապահության նախարարության պետական հիգիենիկ և հակահամաճարակային տեսչության գլխավոր մասնագետ Լիանա Թորոսյանը:
«Գրիպի նկատմամբ այսօր իրականացվում է ուժեղացված համաճարակաբանական հսկողություն: Հիմք ընդունելով մոնիտորինգի տվյալները` ունենք սուր շնչառական վարակների թեթևակի աշխուժացում, բայց՝ ոչ գրիպի: Գրիպի վիրուս, որպես այդպիսին, չունենք հաստատած»,- այս մասին ասաց մասնագետը` հավելելով, որ դրանք պետք է տարանջատել, քանի որ կարող են լինել շնչառական հիվանդություններ, բայց չլինել գրիպ:
Նրա խոսքով, գրիպն ախտորոշվում է միայն այն դեպքում, եթե կա լաբորատոր հաստատում: Սուր վարակիչ հիվանդությունների կանխարգելման նպատակով առողջապահության նախարարությունը խոցելի խմբերի շրջանում իրականացնում է պատվաստում:
«Դրանք առաջնային բուժօղակի բժիշկներն են, շտապօգնության աշխատակիցներն ու ծերանոցների ու մանկատների բնակիչները: Վերջիններս ապրում են փակ միջավայրում, ավելի շուտ են հիվանդանում, և քանի որ վարակն էլ օդակաթիլային ճանապարհով է տարածվում, այդ փակ տարածություններն ավելի են նպաստում վարակի փոխանցմանը»,- հավելեց Լ. Թորոսյանը` տեղեկացնելով, որ Առողջապահության նախարարությունը տարածում է հուշաթերթիկներ բոլոր պոլիկլինիկաներում ու պարբերաբար բնակչությանը տեղեկացնում է գրիպի բարդության ու կանխարգելման միջոցների մասին: