Մայր աթոռի տեղեկատվական համակարգի տնօրեն Վահրամ քահանա Մելիքյանը հերքել է «Ապագան մերն է» քաղաքացիական նախաձեռնության ղեկավար Արմեն Ադամյանի դեկտեմբերի 17-ի հայտարարությանը:
Վահրամ քահանա Մելիքյանը գրում է, որ տարակուսանքով է ծանոթացել «Ապագան մերն է» քաղաքացիական նախաձեռնության ղեկավար Արմեն Ադամյանի հայտարարությանը, որով Մայր աթոռ Ս. Էջմիածնին և Ամենայն հայոց կաթողիկոսին է վերագրվել «Չենք լռելու» երիտասարդական շարժման գործունեության հովանավորությունն ու ուղղորդումը, թեև ժամանակին Մայր աթոռը պաշտոնապես այդ հարցի առնչությամբ հայտնել էր իր դիրքորոշումը:
«Քաղաքացիական հասարակությունը և առավել ևս քաղաքացիական նախաձեռնությունները չեն կարող զրպարտանքի վրա կառուցվել:
Դատապարտում ենք այս նախաձեռնությունը, որի ղեկավարը, ուղղակի կեղծ և անհեթեթ վերագրումներ կատարելով, նպատակ է հետապնդում ստվերել Հայոց եկեղեցու և Ամենայն հայոց հայրապետի հեղինակությունը»,- գրված է նրա դիմումի մեջ:
Վահրամ քահանա Մելիքյանը հորդորում է հայ հասարակությանը չտրվել միտումնավոր նման ապատեղեկատվության ազդեցությանը:
«Մայր աթոռ Ս. Էջմիածինն այլոց նման պետք չունի դիմելու նմանօրինակ միջոցների` արտահայտելու իր կեցվածքը մեր հասարակության կյանքն ալեկոծող տարբեր երևույթների նկատմամբ»,- գրում է Մայր աթոռի տեղեկատվական համակարգի տնօրենը: