Ռուսական Новый Регион-ի փոխանցմամբ, Թուրքիայի էներգետիկայի ու բնական պաշարների նախարար Թաներ Յըլդըզը հայտարարել է, որ Թուրքիան երկու ատոմակայաններ կառուցելու միջոցով մտադիր է նվազեցնել ռուսական գազի ներկրումից ունեցած մեծ կախվածությունը, ինչպես նաև կրճատել իր էներգածախսերը.
«Այդ երկու ատոմակայանների կառուցման շնորհիվ մենք կնվազեցնենք օտար մատակարարումներից մեր կախվածությունը։ Մեր էլեկտրակայանների կարիքների համար ներկրվող տարեկան գազն արժե 7 միլիարդ դոլար։ 3-4 տարվա գազի ներկրումը համարժեք կլինի երկու ատոմակայանների կառուցման ծախսերին»։
Նշվում է, որ Թուրքիան տարեկան Ռուսաստանից ներկրում է 30 միլիարդ խորանարդ մետր գազ, ինչը կազմում է ողջ ներկրվող գազի 64 տոկոսը։ Թուրքիան ԵՄ-ից հետո ռուսական գազի երկրորդ խոշոր սպառողն է։
Հիշեցնենք, որ այս տարվա օգոստոսի վերջին Թաներ Յըլդըզը վերջնագիր էր ներկայացրել Ռուսաստանին` Թուրքիային հատկացվող գազի գինը նվազեցնելու վերաբերյալ՝ ընդգծելով, որ ռուսական «Գազպրոմը» վերջին 29 ամիսների ընթացքում 39 տոկոսով բարձրացրել է գազի գինը։ Սակայն ռուսական կողմը չէր արձագանքել դրան, ինչից հետո Թուրքիան հայտարարել էր, որ չի երկարաձգում դեռևս 25 տարի առաջ կնքված գազային համաձայնագրի ժամկետը, որը սպառվում էր այս տարեվերջին: Ըստ դրա` Ռուսաստանը Արևմտյան գազատարով (Ուկրաինա, Ռումինիա, Բուլղարիա) տարեկան 6 միլիարդ խորանարդ մետր գազ էր հատկացնում Թուրքիային:
Ի դեպ, ներկայումս Թուրքիան ցանկանում է կառուցել 3 ատոմակայան. միջերկրածովյան Մերսին նահանգի Աքքույու վայրում, սևծովյան Սինոպում և Թրակիայում (Թուրքիայի եվրոպական հատված) գտնվող Իղնեադա վայրում։
