«Փաստարկ» ակումբի այսօրվա հյուրը` ԱԺ պատգամավոր Գագիկ Մինասյանը, խոսեց ԼՂ կարգավորման գործընթացի 2011թ. արդյունքների և հեռանկարների մասին:
Անդրադառնալով այն տեսակետին, թե ղարաբաղյան զինադադարի կնքումից հետո հայկական կողմի համար ավելի նպաստավոր շրջան էր, և հենց այդ շրջանում էր ձեռնտու վերջնականապես լուծել խաղաղ կարգավորման հարցը, Գագիկ Մինասյանը նշեց` թեև Ադրբեջանը մեծ միջոցներ է ծախսում սպառազինության վրա, սակայն մենք էլ ունենք անկոտրում ոգի, որի շնորհիվ էլ արձանագրել ենք մեր հաջողությունները:
Նա նշեց նաև, որ ղարաբաղյան կարգավորման գործընթացում պետք է շարունակել բանակցային գործընթացը` օգտվելով Ադրբեջանի դեստրուկտիվ կեցվածքից:
«Դովիլում վերջին հանդիպմանը կարևորվեց, որ ժողովուրդներին պետք է պատրաստել խաղաղության, մինչդեռ Ադրբեջանը հակառակն արեց: Մենք պետք է ավելի պարտադրող կեցվածք դրսևորենք»,- նկատեց Գագիկ Մինասյանը:
Անդրադառնալով այն հարցին, թե Լեռնային Ղարաբաղը չի ընդունի Մադրիդյան սկզբունքները, քանի որ խոսքը տարածքների վերադարձի մասին է, ՀՀԿ-ական պատգամավորն ասաց. «Մադրիդյան սկզբունքները խաղաղ համաձայնագրի լավ հիմք են»:
