Երևանի Շենգավիթ վարչական շրջանի ընդհանուր իրավասության դատարանում` դատավոր Սամվել Մարդանյանի նախագահությամբ, այսօր շարունակվել է Հայաստանի զինված ուժերի պայմանագրային զինծառայող, լեյտենանտ Արտակ Նազարյանի մահվան գործով դատական նիստը: Երեկ և այսօր վկայություն է տվել գործով առանցքային վկաներից մեկը`Արման Մնացականյանը:
Ինչպես «Առաջին լրատվականի» հետ զրույցում տեղեկացրեց Արտակ Նազարյանի քույրը՝ Ծովինար Նազարյանը, վկան երեկ երեք կարևոր հայտարարություն է արել: Վկան նշել է, որ դեպքը տեղի է ունեցել ոչ թե հուլիսի 27-ին, ինչպես նշվում է պաշտոնական վարկածով, այլ մեկ օր առաջ՝ հուլիսի 26-ին:
Հաջորդ կարևոր հայտարարությունն այն է, որ դեպքից հետո իրեն և իր բոլոր ծառայակիցներին տարել են ռազմական ոստիկանություն, բավական երկար պահել այնտեղ: Վկային Բերդ քաղաքի ՌՈ-ում պահել են 23 օր, որից հետո գործով մեկ այլ վկա Արթուր Մկրտչյանի և նրա եղբոր՝ Վարդան Մկրտչյանի հետ տեղափոխել են Երևան՝ ՌՈ-ի Հատուկ նշանակության ջոկատ, որտեղից զորացրվել է միայն Արթուրը:
Արման Մնացականյանի հաջորդ հայտարարությունն այն է, որ դեպքից մի քանի օր առաջ հենակետ է բարձրացել գումարտակի հրամանատար Միշա Գաբրիելյանը, որի մասին նախաքննությունը պնդում էր, թե ամբողջ ժամանակ արձակուրդում է եղել, մի անգամ հուլիսի 16-ին զորամաս է գնացել՝ օգնելու հերթափոխ կատարելու և հենակետեր չի գնացել:
Ծ. Նազարյանի համոզմամբ` վկային այսօր ճնշել էին: Արտակ Նազարյանի իրավահաջորդի ներկայացուցիչ Մուշեղ Շուշանյանը նշեց, որ վկան չկարողացավ բացատրել նախաքննական ցուցմունքում օգտագործված մի շարք բառերի նշանակությունը: «Վկան չկարողացավ բացատրել գերակայություն բառի իմաստը, չկարողացավ ցույց տալ ձախ նախաբազուկը, ավելին՝ ցույց տվեց մեջքը, ցուցմունք բառի իմաստը չկարողացավ բացատրել»,- նշեց Մ. Շուշանյանը`հավելելով, որ այդ բառերը եղել են նրա նախաքննական ցուցմունքում:
Նիստն այսօր հետաձգվեց, որովհետև պաշտպաններից մեկը հնարավորություն չունեցավ նախաքննական մարմինների ցուցմունքների հակասությունների շուրջ հարցեր տալ: Նա ասել է, որ պատրաստվում է դատարանին գրավոր բացարկ ներկայացնել:
Հաջորդ դատական նիստը կկայանա դեկտեմբերի 20-ին՝ ժամը 12.00-ին:
