ԱՄՆ Կոնգրեսի Ներկայացուցիչների պալատը, ընդունելով թիվ 306 բանաձևը, որով ամերիկացի օրենսդիրները Թուրքիայի իշխանություններին կոչ են անում վերադարձնել հայկական, հունական և ասորական եկեղեցիներից բռնագրավված ունեցվածքը, իր տեսակետն է հայտնում առ այն, որ Թուրքիան իր կողմից բռնագրավվածը պետք է վերադարձնի իրական տերերին: «Առաջին լրատվական»-ի հետ զրույցում այս մասին հայտարարեց ՀՅԴ Հայ դատի և քաղաքական հարցերի գրասենյակի պատասխանատու Կիրո Մանոյանը:
«Սա այն պատճառով, որ հայերը, հույներն ու ասորիները կարողանան Թուրքիայում ազատ կերպով իրենց կրոնը դավանել: Թիվ 306 բանաձևը, որ որդեգրվեց ԱՄՆ Կոնգրեսի Ներկայացուցիչների պալատի կողմից, ճիշտ է, որպես փաստաթուղթ իրավական հետևանքներ չունի, օրինագիծ չէ, բայց հիմք է, որպեսզի այս ուղղությամբ այլ աշխատանքներ ևս տարվեն»,- ասաց նա:
Կիրո Մանոյանի խոսքով, թուրքական լոբբին, տվյալ բանաձևի մասով, ձախողել է իրեն: «Հակազդեցությունը բանաձևի հանդեպ կար դեռ ամռանից, երբ հինգ ամիս առաջ Ներկայացուցիչների պալատի Արտաքին հարաբերությունների հանձնաժողովը հաստատեց բանաձևի տեքստը, սակայն թուրքերը չէին էլ պատկերացնում, որ կուլիսներում աշխատանքներ են տարվում»,- ասաց ՀՅԴ Հայ դատի և քաղաքական հարցերի գրասենյակի պատասխանատուն:
Հիշեցնենք, քվեարկությունից մի քանի ժամ առաջ թուրքամետ կոնգրեսականները փորձել են արգելափակել բանաձևը, սակայն` անհաջող։
Վաշինգտոնում Թուրքիայի դեսպան Նամըք Թանը հայտարարել էր, թե Միացյալ Նահանգների Կոնգրեսի Ներկայացուցիչների պալատի ընդունած բանաձևն ընդդեմ Թուրքիայի անարդար է և անհիմն։
