Եթե նախկինում Ալեքսանդր Մալայանի ակնաբուժական կլինիկայում բժշկական քարտ բացելու արժեքը 6 հազար դրամ էր, ապա այսօր արդեն մինչեւ 5 տարեկան երեխաների համար այն 5 հազար դրամ է, իսկ 5-ից բարձրերի համար` 15 հազար դրամ: Ի դեպ, բարձրացել են ոչ միայն քարտերի, այլեւ բոլոր բուժծառայությունների գները: Հայաստանի գլխավոր ակնաբույժ Ալեքսանդր Մալայանին փոխանցեցինք բնակիչների դժգոհությունը եւ հետաքրքրվեցինք, թե որն է գների կտրուկ թանկացման պատճառը: Նա հակադարձեց, թե բնակիչները թող դժգոհեն այն դեպուտատներից, ովքեր ընտրություններից առաջ մատչելի բուժում են խոստանում, իսկ ընտրվելուց հետո մոռանում դրա մասին: Իսկ իրենք բուժումը չեն կարող մատչելի դարձնել, քանի որ հակառակ դեպքում՝ այս համատարած թանկացումների պայմաններում, իրենց ծախսերը չեն կարող փակել: Իսկ երբ հարցրինք, թե ինչ անեն այն քաղաքացները, որոնք հնարավորութուն չունեն դիմելու մասնագետներին, ակնաբույժը հավելեց, որ դա արդեն պետության խնդիրն է, որովհետեւ համարժեք թանկացումների դեպքում պետք է բարձրացվեն նաեւ մարդկանց աշխատավարձերը: Ի դեպ, երբ Հայաստանի գլխավոր ակնաբույժին հիշեցրինք, որ մինչեւ 7 տարեկան երեխաների բուժումը ՀՀ-ում անվճար է իրականացվում, այնինչ միայն քարտի համար տվյալ կլինիկայում մինչեւ 5 տարեկան երեխաներից 5 հազար դրամ գումար են պահանջում, նա անակնկալի եկավ, այնուհետեւ զանգահարեց աշխատակիցներից մեկին ու պարզաբանեց, թե դա բացառիկ դեպքերում է այդպես կատարվում: «Հիմա, եթե ծնողը երեք տարեկան երեխայի ձեռքը բռնած գա, եւ այդ երեխայի աչքը պատռված լինի, մենք ստիպված ենք լինելու նրա բուժման դիմաց վճար պահանջել: Ճիշտ է, պետությունը գումար տրամադրում է, բայց այդ գումարները շատ քիչ են եւ չեն փակում մեր կատարած ծախսերը», – եզրափակեց Ալեքսանդր Մալայանը: Այնինչ, երբ մենք քարտադարանում հետաքրքրվեցինք, թե որքան է 5 տարեկան երեխայի քարտի արժեքը, նրանք առանց հետաքրքրվելու` դա բացառիկ դեպքերից է, թե ոչ, միանգամից նետեցին` 5 հազար դրամ:
