Լեդի Գագայի մերկ նկարը վաճառքի է հանվելու eBay օնլայն աճուրդում:
Ինչպես հայտնում է Gigwise կայքը, այն մատիտով նկարել է ամերիկացի էստրադային և ջազային երգիչ Թոնի Բեննեթը, որը վերջերս Լեդի Գագայի հետ ձայնագրվել և մասնակցել էր համատեղ ֆոտոսեսիայի:
Թոնի Բեննեթը Լեդին Գագային նկարել է Vanity Fair ամսագրի համար արված նկարահանումների ժամանակ: Նրանց համատեղ նկարները լույս են տեսնելու 2012 թվականի հունվարին՝ Vanity Fair-ի հերթական համարում:
Վերջերս Լեդի Գագան պատմել է Բեննեթի հետ նկարահանումների մասին, նաև՝ այն մասին, որ վերջինս որոշել է իրեն մերկ նկարել: Երգչուհու խոսքերով, ինքը մի փոքր անհարմար է զգացել երգչի բնորդուհին լինելու հանգամանքից:
Աճուրդը eBay-ում տեղադրվել է դեկտեմբերի 12-ին և ավարտվելու է մեկ շաբաթ անց: Նկարի նախնական գինը 5000 դոլար է:
Նկարի վաճառքից ստացված ողջ հասույթը տրամադրվելու է բարեգործական կազմակերպությանը, որը ստեղծել են Լեդի Գագան և Բեննեթը: