Ադրբեջանական 1news.az-ի փոխանցմամբ՝ Amnesty International (AI) միջազգային իրավապաշտպան կազմակերպությունը դեկտեմբերի 15-ին հրապարակելու է Իրանում թմրանյութերի տարածման համար սահմանվող մահապատիժների վերաբերյալ զեկույցը։
Դրանում նշված է, որ Իրանում թմրանյութերի տարածման համար իրականացվող մահապատիժները հասնում են սպառնալից չափերի։ Միայն նոյեմբերի 25-ին Իրանի հարավում ընկած Շիրազ քաղաքում կախաղան բարձրացվեց 11 մարդ, որոնց ավելի վաղ մեղավոր էին ճանաչել թմրանյութերի մաքսանենգության մեջ։
Զեկույցում AI-ն իրանական իշխանություններին կոչ է անում դադարեցնել թմրահանցագործությունների մեջ մեղադրվող մարդկանց նկատմամբ մահապատիժներ իրագործելը։ Զեկույցում միջազգային հանրությանը կոչ է արվում ուշադրություն դարձնել այդ խնդրի վրա։
Հիշեցնենք, որ Իրանում մահապատիժը կիրառվում է 1979 թվականին տեղի ունեցած իսլամական հեղաշրջումից ի վեր՝ համաձայն շարիաթի օրենքների։ Մահապատժի տեսակներից հիմնականում գործածվում է կախաղան բարձրացնելը, ինչպես նաև քարկոծումը, անդունդից գլորելն ու գնդակահարությունը։
