«Ժառանգության»` ԱԺ ներկայացրած «Լյուստրացիայի մասին» օրինագծի վերաբերյալ բազմաթիվ պիտակավորումներ են եղել, սակայն պիտակավորումներ եղել են նաև ԼՂՀ ճանաչման օրինագծի ներկայացման ժամանակ: Այսօր կայացած ասուլիսում այս մասին հիշեցրեց «Ժառանգության» ղեկավար Րաֆֆի Հովհաննիսյանը:
«Լավ կլիներ եթե հարցը քննարկվեր իննսունականներին: Սա ինքնամաքրման տեսանկյունից անհրաժեշտ քայլ է` ուղղված բոլոր օտար ծառայություններին: ՀՀ քաղաքացին պիտի իմանա այն մարդու անունը, ով աշխատել է որպես գործակալ: Հատկապես այսօր, երբ Հայաստանը քայլ է անում դեպի ժողովրդավարական արժեքներ, ձայնի և տեղեկության իրավունքն ամենակարևորներից է: Հույս ունեմ` օրինագիծը լուրջ քննարկման կարժանանա, հանրային բանավեճ կլինի, որն էլ կբերի ներքին ինքնամաքրման»,- ասաց Հովհաննիսյանը:
Անդրադառնալով Ռուսաստան-Հայաստան հարաբերություններին` նա նկատեց, որ դրանք պետք է դառնան իրական ռազմավարական, և ոչ թե իշխանությունը թելերով կախված լինելով Կրեմլից` մոռանա ազգային շահերի մասին:
«Մենք այս ամենի հետ մեկտեղ պետք է մեր շահը հետապնդենք: Ինչ վերաբերում է Եվրասիական միությանը մեր անդամակցությանը` այդ կառույցը եթե լինելու է սոսկ ԱՊՀ-ի շարունակություն, Հայաստանի անդամակցությունն այնքան էլ նպատակահարմար չէ»,- ամփոփեց Հովհաննիսյանը:
