Եթե ՀՀԿ-ն և «Բարգավաճ Հայաստանն» ընտրությունների գնան միասնական ցուցակով, չի բացառվում, որ ԲՀԿ համակիրների որոշ մասն իր ձայնը տա Հայ ազգային կոնգրեսին: «Առաջին լրատվական»-ի հետ զրույցում նման տեսակետ հայտնեց ԱԺ «Ժառանգություն» խմբակցության պատգամավոր Արմեն Մարտիրոսյանը՝ պատասխանելով հարցին, թե եթե ԲՀԿ-ն որոշի ՀՀԿ հետ միասնական ցուցակով գնալ ընտրությունների, այդ դեպքում ո՞վ առավել շահեկան դիրքերում կհայտնվի՝ Հանրապետակա՞նը, թե՞ ամեն դեպքում՝ ՀԱԿ-ը:
«ՀՀԿ-ն և «Բարգավաճ Հայաստանն» իրենց ընտրազանգվածն ունեն, իսկ ահա ԲՀԿ-ի ու ՀԱԿ-ի պարագայում դրանք խաչաձևվում են: Հնարավոր է, որ լինեն ընտրազանգվածի որոշակի ուղղորդումներ այս կողմից այն կողմ, և հակառակը, բայց ԲՀԿ համար ընտրազանգվածի մեծածավալ կորուստներ չեմ սպասում: ԲՀԿ-ի և ՀՀԿ-ի միասնական ցուցակից դժգոհ միայն մի փոքր հատված իր ձայնը կտա ՀԱԿ-ին: Բացի այդ, ՀՀԿ և «Բարգավաճ Հայաստան» կուսակցություններն, ամենայն հավանականությամբ, կհետևեն քաղաքական տրամաբանությանը, և չի բացառվում, որ ընտրությունների գնան միասնական ցուցակով: Ցանկացած պարագայում նորմալ եմ վերաբերվում, եթե նրանք այդպիսի որոշում կայացնեն, որևէ խնդիր չեմ տեսնում:
Ցանկացած պարագայում կարծում եմ, որ հասարակության մեծամասնությունը ընդդիմությանն է համակրում և քիչ թե շատ նորմալ ընտրություններ անցկացնելու դեպքում միանշանակորեն ընդդիմադիր կուսակցությունները կունենան հարաբերական մեծամասնություն: Հասարակությունն իր համար կպարզի՝ ով քաղաքական դաշտի որ հատվածում է, և ավելի հեշտ կկողմնորոշվի»,- նկատեց Մարտիրոսյանը:
