Հայաստանում մարդու իրավունքների պաշտպանությունը մնում է մտահոգիչ: «Առաջին լրատվական»-ի հետ զրույցում նման տեսակետ հայտնեց ՀՔԱ Վանաձորի գրասենյակի նախագահ Արթուր Սաքունցը`խոսելով Հայաստանում մարդու իրավունքների պաշտպանությունից:
Անդրադառնալով բանակում մարդու իրավունքների պաշտպանությանը`իրավապաշտպանը նշեց, որ
բանակում մահացության դեպքերը դեռ շարունակվում են, ոչ կանոնադրական հարաբերությունները նույնպես շարունակվում են և կյանքի իրավունքը ապահովված չէ: Երկրորդ խնդիրը, որին անդրադարձավ նա, ներքին մեխանիզմներն են:
«Խախտված իրավունքների կանխարգելում կամ խախտված իրավունքների արդյունավետ պաշտպանություն չի իրականացվում: Ինձ համար մտահոգիչ է ոչ միայն այն, որ նախաքննության պատասխանատուները չեն բացահայտում հանցագործությունները, այլ այն, որ կոռուպցիոն ռիսկերը մեծ ազդեցություն ունեն բանակում հոգեբանական, բարոյական վիճակի, ընդհանրապես իրավական վիճակի վրա»,- նշեց Ա. Սաքունցը:
Նրա համոզմամբ, այդ խնդիրների նկատմամբ քաղաքականություն մշակող մարմինների պատասխանատուները ոչ թե հակված են խնդիրները հիմնովին լուծելուն, այլ կոսմետիկ, մակերեսային, ոչ խորքային: Իրավապաշտպանը ցավով նշեց, որ բանակը դեռևս մնում է մարդու իրավունքները խախտող համակարգ:
Խոսելով ոստիկանություն-հասարակություն հարաբերություններից`Ա. Սաքունցն ասաց, որ ոստիկանական համակարգում շարունակվել և շարունակվում են բռնությունները քաղաքացիների նկատմամբ, մասնավորապես այն ժամանակ, երբ նրանց բերման են ենթարկում: Նա այն համոզմանն է, որ ցուցմունքներ կորզելու և ապացույցներ ձեռք բերելու նպատակով, որպես կանոն, կիրառվում են բռնություն, ճնշումներ, ապօրինի խուզարկություններ:
Իրավապաշտպանի կարծիքով`այստեղ կադրային փոփոխություններով հարցը չի լուծվի, քանի որ մարդկանց հավասարությունը բոլորի համար չէ, իրավունքի գերազանցության սկզբունքը չի աշխատում, իրավախախտումների պատասխանատուները պատասխանատվության չեն ենթարկվում:
