Քանի որ ԵԱՀԿ-ում որոշումների ընդունման կարգը քվեարկությամբ չէ, այլ կոնսենսուսով՝ միաձայնությամբ, ապա Ռուսաստանի կողմից արգելափակված կիբերտարածության մասին հռչակագրի վերաբերյալ Հայաստանի դիրքորոշումն այս պարագայում այնքան էլ էական չէ : «Առաջին լրատվական»-ի հետ զրույցում այս մասին ասաց ԱԳ մամուլի քարտուղար Տիգրան Բալայանը:
«Որոշումները՝ որպես այդպիսին, քվեարկության չեն դրվում, պարզապես եթե ԵԱՀԿ երկրներից որևէ մեկը համաձայն չէ տվյալ որոշման հետ, ապա այն միաձայն չի ընդունվում: Անկախ նրանից՝ Հայաստանը կամ մեկ այլ երկիր նման դեպքում ինչ դիրքորոշում ունի, որոշումը, միևնույն է, չի անցնում»,- նկատեց նա:
Տիգրան Բալայանը միաժամանակ նշեց` տեղյակ չէ, թե Հայաստանն ինչ դիրքորոշում ունի հռչակագրի վերաբերյալ, ճշտելուց հետո մեզ տեղյակ կպահի:
Նշենք, որ Լիտվայում կայացած ԵԱՀԿ երկրների նախարարների խորհրդաժողովում չի հաջողվել ընդունել «Թվային դարում հիմնարար սկզբունքների մասին» հռչակագիրը:
Փաստաթուղթն արգելափակել են Ռուսաստանը և մի շարք այլ երկրներ: