Ռուսական Интерфакс լրատվական գործակալության փոխանցմամբ, Հարավային Օսիայի նախագահական ընտրությունների նախկին թեկնածու Ալլա Ջիոևան հայտարարել է Հարավային Օսիայում «ժողովրդական ճակատ» ձևավորելու մասին, որը նվիրված է Ռուսաստանի առաջիկա նախագահական ընտրություններում ներկայիս վարչապետ Վլադիմիր Պուտինի թեկնածության աջակցությանը.
«Այդ շարժման մեջ կներգրավվեն Հարավային Օսիայի 16,000 քաղաքացիներ, որոնք նոյեմբերի 27-ին տեղի ունեցած նախագահական ընտրությունների երկրորդ փուլում քվեարկել են իմ թեկնածության օգտին։ Սա մեր ռուսամետ կողմնորոշման լավագույն ապացույցն է։ Մենք շնորհակալ ենք Վլադիմիր Պուտինին ու Դմիտրի Մեդվեդևին այն աջակցության համար, որ նրանք ցուցաբերել և ցուցաբերում են մեզ։
Հարավային Օսիայի գործող նախագահ Էդուարդ Կոկոյտիի լիազորությունների ժամկետը սպառվել է, և նա պետք է օրինական ճանապարհով իշխանությունը հանձնի մեզ։ Եթե դա տեղի չունենա մոտ օրերս, ապա մենք մտադիր ենք իմ երդման արարողությունն իրականացնել դեկտեմբերի 10-ին, ժամը 14.00-ին, Ցխինվալի կենտրոնական հրապարակում։ Արարողությանը կմասնակցեն իմ թեկնածության օգտին քվեարկած Հարավային Օսիայի 16,000 քաղաքացիներ»։
Հիշեցնենք, որ սրանից առաջ Ջիոևան դիմել էր ռուսական իշխանություններին՝ կոչ անելով ճանաչել նոյեմբերի 27-ի ընտրությունների արդյունքները։ Ջիոևան հայտարարել էր, որ չի հասկանում, թե ինչո՞ւ և ինչո՞վ դուր չի գալիս ռուսական իշխանություններին։