Սիրիայում ռազմավարական նշանակության նավթամուղ է պայթեցվել, որով նավթը հասնում էր Հոմս քաղաքի նավթավերամշակման գործարան: Այս մասին հաղորդում է Reuters գործակալությունը՝ վկայակոչելով Լոնդոնում տեղակայված «Մարդու իրավունքներին հետևելու մոնիտորինգի սիրիական կենտրոն» իրավապաշտպանական կազմակերպությանը:
«Սա Հոմսի գործարանին սպասարկող միակ նավթամուղն է»,- ասել է կազմակերպության ներկայացուցիչ Ռամի Աբդուլռահմանը:
Ըստ իրավապաշտպանների՝ նավթամուղը պայթեցրել են կառավարական զորքերը:
Մինչդեռ սիրիական պետական SANA լրատվական գործակալությունը հաղորդում է, որ պայթյունն իրականացվել է «զինված ահաբեկչական խմբերի կողմից»: Ընդ որում՝ նրանց թվի կամ դրդապատճառների մասին ոչինչ չի հաղորդվում:
Հոմս քաղաքը Սիրիայի ապստամբների գլխավոր հենակետն է և գտնվում է երկրի կենտրոնական հատվածում: Քաղաքի ծայրամասում գտնվում է խոշոր նավթավերամշակման գործարան, որն աշխատանքով է ապահովում տեղի բնակչության մեծ մասին: ՀԵնց այդ գործարանի աշխատանքի շնորհիվ ընդդիմադիրները վառելիքի պակաս չեն ունեցել:
Թե ով է պայթեցրել նավթամուղը՝ առայժմ հայտնի չէ: Այնուամենայնիվ, հրդեհը հանգցնելու և նավթամուղը վերականգնելու աշխատանքներով դեռ ոչ ոք չի զբաղվում:
