Սաուդյան Արաբիայի իշխանությունների կողմից աստվածանարգության մեջ մեղադրվող ավստրալացին դատապարտվել է մտրակի 500 հարվածների և մեկ տարվա ազատազրկման: Այս մասին հաղորդում է Agence France-Presse-ը՝ վկայակոչելով Ավստրալիայի ԱԳՆ-ն:
Գործակալության տեղեկություններով՝ 45-ամյա Մանսոր Ալմարիբեն ձերբակալվել է Մեդինայում նոյեմբերի 14-ին՝ հաջի ժամանակ, և մեղադրվել Մուհամմադ մարգարեի ուղեկիցներին վիրավորելու մեջ: Դատարանի վճռից հետո Սաուդյան Արաբիայում Ավստրալիայի դեսպանը դիմել է իշխանություններին՝ խնդրելով թեթևացնել դատավճիռը:
Ավստրալիայի ԱԳՆ ներկայացուցչի խոսքերով՝ Ավստրալիայի կառավարությունը կտրականապես դեմ է հանդես գալիս մարմնական պատիժներին: Գործակալությունը նշում է, որ սկզբնապես ավստրալացուն դատապարտել են 2 տարվա ազատազրկման, իսկ հետո այդ չափը կրճատվել է:
Ալմարիբեի ավագ որդին՝ Ջամալը, նշել է, որ աղոթքի ժամանակ կրոնական ոստիկանության աշխատակիցներն առանց պատճառի ձերբակալել են իր հորը: ABC ռադիոկայանին տված հարցազրույցում նա հայտնել է, որ իր հայրը մեջքի հիվանդություն ունի և հազիվ թե դիմանա մտրակի թեկուզ 50 հարվածի: Բացի այդ, նշվում է, որ նա տառապում է նաև շաաքրային դիաբետով և սրտային անբավարարությամբ:
