Մեղքի և ամոթի զգացումով հաստատում ենք, որ 1988-ի երկրաշարժից 23 տարի անց հազարավոր ընտանիքներ շարունակում են անօթևան մնալ. այսօր` Սպիտակի երկրաշարժի տարելիցի օրը հրավիրված մամուլի ասուլիսում հայտարարեց «Սարդարապատ» շարժման նախաձեռնող խմբի անդամ Ժիրայր Սեֆիլյանը:
Անդրադառնալով ներքաղաքական դաշտի զարգացումներին` նա նկատեց. «Այն, ինչ կատարվում է, այսպես կոչված, քաղաքական ասպարեզում, և ինչ տեսք էլ որ ստացվի վերադասավորումներից, հավատացնում եմ` դրանից մեր երկրին և ժողովրդին ոչ մի օգուտ չի լինելու: Այս ամենը ունի մեկ նպատակ. գործող բռնապետի դիրքերի ամրացում:
Ինչ վերաբերում է կոալիցիոն երկու կուսակցությունների հարաբերություններին, ապա ՀՀԿ-ի և ԲՀԿ-ի միջև դերասանությունը տեսնում ենք ընտրությունից ընտրություն, ժողովուրդը ստիպված է այս անգամ էլ ականատես լինել այս թատրոնին: Վերևներում, սակայն, ամեն բան կանխորոշված է, և ՀՀԿ-ԲՀԿ «հակասությունները» սուտ պայքարի վկայություն են: Ժողովրդին կոչ եմ անում այնքան էլ լուրջ չվերաբերվել սրան, քանի որ ամբողջը կանխորոշված է իշխանությունների կողմից»:
Ըստ Սեֆիլյանի` «մենք ոչ հեռու ապագայում ականատեսն ենք լինելու նրա, որ գործող իշխանությունները զրկվելու են ինչպես հայրենիքի, այնպես էլ Սփյուռքի հայերի աջակցությունից»:
«Արաբական գարունից հետո լուրջ մտավախություն կա, որ այլևս հնարավոր չի լինելու ժողովրդի մոտ հարգանք առաջացնել ապագայում թխվող իշխանությունների հանդեպ»,- նշեց «Սարդարապատ» շարժման նախաձեռնող խմբի անդամը:
Խոսելով առաջիկա ընտրությունների մասին` բանախոսը նկատեց. «Մենք առհասարակ կողմ ենք ընտրություններին, որպեսզի դրանց միջոցով ձևավորվի լեգիտիմ իշխանություն, սակայն գիտակցում ենք, որ ներկա պայմաններում դա անհնար է: Ամեն բան կանխորոշված է, ինչ արդյունքներ էլ լինեն` դրանք բեմականացված են լինելու:
Մեր երկիրն օկուպացված է մի քանի մարդու կողմից. այդ է պատճառը, որ մենք դեմ ենք ընտրություններին մասնակցելուն: Ի՞նչ ընտրությունների մասին է խոսքը, երբ ժողովրդի ձայները հաշվողը գող է: Հայաստանում ընտրությունները վերածվել են ռեժիմի վերարտադրության, հետևաբար չենք ուզում մասնակցել այդ գործընթացին, մենք չենք ուզում ժողովրդին վնասող քայլեր անել:
Միաժամանակ, ելքն ընտրությունների միջոցով չի լինելու. այս իշխանություններն ընտրություններով չեն եկել, որ ընտրություններով էլ գնան:
Մեր առաջարկած հունը հետևյալն է. ճահճից դուրս ձևավորել ազնիվ դաշտ, այլընտրանքային իշխանություն: Մենք պատրաստվում ենք ժողովրդի կամքի պարտադրմամբ տապալել այս իշխանություններին և այլընտրանքային իշխանություն ձևավորել: Մենք իրավունք չունենք մեր երկիրը երկարատև ցնցումների մեջ պահել, և ամեն բան շատ արագ պետք է կատարվի: Գիտակցում ենք, որ շատ ժամանակ և սխալվելու իրավունք չունենք»,- ընդգծեց Սեֆիլյանը:
Ամփոփելով` Ժիրայր Սեֆիլյանը հայտնեց հետևյալ տեսակետը. քաղաքական դաշտում բեմականացումը դեռ երկար է շարունակվելու. «Իշխող կլանը մեր ժողովրդին ոչխարի տեղ է դնում, դրա համար էլ դեռ մինչև մայիս ականատես ենք լինելու թատրոնի: Իսկ այս ամենի ռեժիսորը Սերժ Սարգսյանն է»:
