Ռուսական Regnum լրատվական գործակալության փոխանցմամբ՝ ԱՄՆ փոխնախագահ Ջոզեֆ Բայդենը, Ստամբուլում ելույթ ունենալով Գլոբալ ձեռնարկատիրական 2-րդ գագաթնաժողովում, հայտարարել է, որ Վաշինգտոնն աջակցում է Թուրքիային ահաբեկչության դեմ պայքարի, Սիրիային առնչվող և այլ տարածաշրջանային հարցերում։
Ընդգծելով, որ Թուրքիան և մյուս երկրները ձգտում են Սիրիայում դադարեցնել մարդու իրավունքների խախտումները՝ Բայդենը հայտարարել է, որ ժողովրդավարական հեղափոխություններն ու վերակազմավորումները հանդիսանում են ակտիվիստների գործունեության արդյունք։
Անդրադառնալով Թուրքիայի տնտեսական հաջողություններին՝ Բայդենը հայտարարել է, որ 2023 թվականին (Թուրքիայի Հանրապետության հիմնադրման 100-ամյակ) Թուրքիան ընդգրկվելու է աշխարհի խոշորագույն տնտեսություններն ունեցող երկրների լավագույն տասնյակում։
Հիշեցնենք, որ այս տարվա նոյեմբերի սկզբին Jones Lang LaSalle միջազգային քոնսալթինգային ընկերությունն իր զեկույցում նշել էր, որ 2011-2015 թվականներին Թուրքիայի տնտեսությունը շարունակելու է պահպանել եվրոպական երկրների թվում իր առաջատար դիրքը՝ հանդիսանալով ամենաարագ զարգացող տնտեսությունը։
