Յուրաքանչյուր ընտրությունից առաջ և հետո սրվում է քաղաքական պայքարը Հայաստանում, որը կամ զուգահեռաբար է ազդում կուսակցությունների տնտեսական հենարանների վրա, կամ հետո է տեղափոխվում տնտեսական հետաքրքրությունների դաշտ… ու սկսվում է ազդեցության ոլորտների համար կատաղի պայքարը:
Արմավիրի մարզում կարծես թե շարունակվում է անվերջ թվացող հակամարտությունը ՀՀԿ-ական և բարգավաճամետ ուժերի միջև: Դեկտեմբերի 1-ին, առավոտյան 8.30-ի սահմաններում, Արմավիրի մարզի Ջանֆիդա համայնքում կրակոցներ էին հնչել ԱԺ պատգամավոր, ԵԿՄ անդամ, ԲՀԿ-ամետ Ռուստամ Գասպարյանի տան ուղղությամբ: Ըստ շրջանառվող լուրերի` պատգամավորը հանրապետությունում չէ: Թեև խոսակցություններ են շրջանառվում, թե կրակոցները պատգամավորի տան մոտ չեն եղել, սակայն Ռուստամ Գասպարյանի համագյուղացիներից շատերը հակված են կարծելու, որ կրակոցների հետևում հնարավոր է ՀՀԿ-ական պատգամավոր Նովոն` Նահապետ Գևորգյանը լինի, որի հետ Ռուստամ Գասպարյանը տարիներ շարունակ հակասությունների մեջ է:
Ոստիկանությունը միջադեպի մասին տեղեկություններ դեռ չի տարածել, բայց որ վերը նշված հակասություններն արդեն 10 տարվա պատմություն ունեն` համոզիչ են դարձնում ԲՀԿ-ամետ Ռ. Գասպարյանի և ՀՀԿ պատգամավոր Ն. Գևորգյանի, Արմավիրի նախկին քաղաքապետ, հհկամետ Ռուբեն Խլղաթյանի միջև եղած քրեական պատմությունները:
Սկսենք 2002-ից. ապրիլի 30-ին, երեկոյան սպանվում է Արմավիրի մարզի Նորապատ գյուղի գյուղապետ, 51-ամյա Զորիկ Բադալյանը: Նա սպանվել էր Արմավիր քաղաքի Կարմիր կամուրջի մոտ` ավտոմատ հրազենից արձակված կրակոցներով: Նույն գիշերը սպանության մեղադրանքով ձերբակալվել էր Նորապատի հարևան գյուղի` Ջանֆիդայի 35-ամյա բնակիչ, ԵԿՄ անդամ, նախկինում դատված Գագիկ Պետրոսյանը: Այն ժամանակ նորապատցիները պնդում էին, որ սպանողը Ռ. Գասպարյանի մտերիմ ընկերն է, իսկ սպանության դրդապատճառը, վեճը գյուղի մերձակայքում գտնվող շուկայի նկատմամբ վերահսկողության շուրջ է եղել. Նորապատի գյուղապետը չի ցանկացել շուկայի վերահսկողությունը զիջել Ջանֆիդայի բնակիչներին: Մինչդեռ գյուղմթերքների շուկան տրված է եղել Երկրապահ կամավորականների միությանը` ազատամարտիկների ընտանիքների հոգսերը քիչ թե շատ թեթևացնելու նպատակով, և որը մինչ օրս տնօրինում է Երկրապահ կամավորական միության Արմավիրի տարածքային կառույցի ղեկավար Ռուստամ Գասպարյանը: Նորապատի գյուղապետի սպանությունից հետո Ջանֆիդա և Նորապատ գյուղերում վիճակն այն աստիճան լարված էր, որ հնարավոր բախումները կանխելու և լարվածությունը չեզոքացնելու նպատակով գյուղերում տեղակայվել էին ներքին գործերի հատուկ ստորաբաժանումներ, իսկ Ջանֆիդա գյուղի մի շարք բնակիչների տանը խուզարկություններ էին սկսվել և զենքեր հայտնաբերվել: Դրանց առնչությամբ առանձին քրեական գործ էր հարուցվել և 4 մարդ ձերբակալվել:
Դրանից 4 տարի անց` 2006 թ. մահափորձ էր իրականացվել Ռուստամ Գասպարյանի նկատմամբ: Ապրիլի 1-ին, ժամը 15:30-ի սահմաններում, Ռ. Գասպարյանն իր անձնական օգտագործման սև «Համմեր-2» մակնիշի, 02 ՕՍ 444 պետհամարանիշի ավտոմեքենան կանգնեցրել էր Արմավիրի քաղաքային կադաստրի շենքի հարևանությամբ և մտել Հանրապետության փողոցում գտնվող Բարգավաճ Հայաստան կուսակցության Արմավիրի տարածքային գրասենյակ: Որոշ ժամանակ անց դուրս էր եկել այնտեղից, տեսել Արմավիրի նախկին քաղաքապետ Նորայր Մնոյանին, մի պահ զրուցելուց հետո շարժվել էր դեպի իր ավտոմեքենան: Նստելու պահին հակառակ մայթին կայանված «ՎԱԶ-2174» մակնիշի, սպիտակ գույնի, 28 ՕՍ 785 պետհամարանիշի ավտոմեքենայից անհայտ անձը ինքնաձիգով մի ամբողջ պահունակ դատարկել էր Ռուստամ Գասպարյանի ուղղությամբ` մի քանի հրազենային վիրավորումներ հասցնելով նրա ձեռքի և ոտքերի շրջանում:
Երբ մարդասպանը փորձել էր մոտենալ` համոզվելու` պատգամավորը մահացել է, թե ոչ և, ամենայն հավանականությամբ, ստուգիչ կրակոց արձակելու, պատգամավորին օգնության էր հասել վերջինիս ընկեր Էդիկ Ս.-ն և ատրճանակի կրակոցներով կանխել էր նրա գործողությունները: Ռ. Գասպարյանի նկատմամբ մահափորձ իրականացնողն իր ավտոմեքենայով դիմել էր փախուստի: Դեպքի վայրում հայտնաբերվել էին 28 հատ 5,45 մմ տրամաչափի կրակված պարկուճներ, իսկ 200 մ հեռավորության վրա` «ՎԱԶ-2174» մակնիշի ավտոմեքենան, որի սրահում հայտնաբերվել և առգրավվել էին ինքնաձիգի 2 պահունակ` լիցքավորված 5.45 մմ տրամաչափի 60 փամփուշտով: Արմավիրի մարզի դատախազությունում հարուցվել էր քրգործ` հանրորեն վտանգավոր եղանակով կատարված մահափորձի և ապօրինի զենք կրելու, պահելու, օգտագործելու հիմքով:
Ավելի ուշ պարզվել էր, որ մահափորձ կատարողը, օրեր անց իրավապահներին կամավոր ներկայացած Արմավիր քաղաքի Սահմանապահների փողոցի 47 շենքի 6-րդ բնակարանի բնակիչ Սամսոն Պողոսյանն է` Նահապետ Գևորգյանի որդու ընկերը: Ըստ մամուլում հայտնված տեղեկությունների` Սամսոն Պողոսյանի բիզնեսը հովանավորել է Արմավիրի մարզի Արմավիր գյուղի բնակիչ, նույն մարզի մի քանի քարհանքերի և Արմավիր քաղաքի սկզբնամասում գտնվող գազալցակայանի սեփականատեր Նահապետ Գևորգյանը: Արմավիրցիների տեղեկություններով, Նովոյին պատկանող գազալցակայաններից մեկը տնօրինել է հենց Ս. Պողոսյանը:
Խոսակցություններ կային, որ վերջինս հանցանքի վայրից փախուստի էր դիմել 3 տարբեր ավտոմեքենաներով, և այդ երթուղին անցել էր գեներալ Մանվել Գրիգորյանին պատկանող շոգեբաղնիքի մոտով: Սամսոնին այնտեղից մեկ այլ ավտոմեքենայով հասցրել էին Փարաքարի ՊԱՏ հսկիչ կետի մոտ սպասող Նահապետ Գևորգյանին սպասող մեքենայի մոտ: Ըստ շրջանառվող տեղեկությունների` այս դեպքում էլ կրկին հանցագործության դրդապատճառը վերը նշված գյուղմթերքների շուկան էր եղել, որի նկատմամբ հետաքրքրություն էր ունեցել ՀՀԿ-ական պատգամավորը:
Ի դեպ, ըստ մամուլում հայտնված տեղեկությունների` մահափորձի նախաքննությունն այլ ենթատեքստով տանելու նպատակով այն ժամանակվա դատախազին էին հանդիպել Արմավիրի այն ժամանակվա քաղաքապետ Ռուբեն Խլղաթյանն ու ԱԺ պատգամավոր Նահապետ Գևորգյանը, սակայն, կարծես թե, այդպես էլ համաձայնության չէին եկել: Իսկ 2010-ից սկսած այս երկու անձինք սկսել էին աշխատել Ռ. Գասպարյանի եղբոր` Արմավիրի քաղաքապետի թեկնածուի դեմ` 2011 թ. մարտին կայանալիք ընտրություններին ընդառաջ: Ռ. Գասպարյանի եղբոր` Սերոբի դեմ Խլղաթյանն առաջադրել էր այն ժամանակ փոխքաղաքապետ, իր քրոջ որդու` Մելիք Բաղդասարյանի թեկնածությունը, իսկ Նահապետ Գևորգյանը` նախագահի վերահսկողական ծառայությունում աշխատող իր որդու՝ Արտակ Գևորգյանի թեկնածությունը: Այս տարվա ապրիլին էլ ԶԼՄ-ները հայտնեցին, որ Ռուստամ Գասպարյանի քրոջ որդին դանակահարել է Խլղաթյանի եղբոր որդուն` Կամո Խլղաթյանին: Եվ կրկին քրգործ էր հարուցվել` խուլիգանության փաստով:
Հ.Գ. Թե որքան է շարունակվելու այս վիճակը և ինչ շրջադարձեր է ունենալու` թերևս դժվարանանք ասել, բայց որ ամսվա առաջին և վերջին օրերը ճակատագրական են դառնում քաղաքական թիմերի այս ներկայացուցիչների համար` ակնհայտ է դառնում: Երեկ «Ժամանակը» տեղեկություն ստացավ, որ Ռ. Գասպարյանը Հայաստանը լքելու մտադրություն ունի. այդպես է, թե ոչ` պարզել չհաջողվեց: Պատգամավորի հեռախոսն անջատված էր, ԲՀԿ նախագահի մամլո խոսնակ Խաչիկ Գալստյանն էլ չէր պատասխանում մեր հեռախոսազանգերին…Բայց եթե հաշվի առնենք, որ ԲՀԿ-ՀՀԿ քաղաքական պայքարը սրվում է, չի բացառվում, որ Ռուստամ Գասպարյանին ուղղակի ստիպեն հեռանալ երկրից: Կհաջողվի, թե ոչ, արդեն այլ հարց է:
«Ժամանակ»