Մամուլում տեղեկություն էր հայտնվել այն մասին, որ թեև իշխանության մեջ տեղի են ունեցել փոփոխություններ, որոնք առնչություն ունեն Ազգային անվտանգության խորհրդի կազմի հետ, բայց այդ կազմում Սերժ Սարգսյանը դեռ չի կատարել անհրաժեշտ փոփոխություններ:
Օրինակ, ոստիկանապետ Վովա Գասպարյանը արդեն պաշտոնավարում է մի քանի շաբաթ, բայց ԱԱԽ կազմում է դեռևս նախկին ոստիկանապետ Ալիկ Սարգսյանը: Ինչու է Սերժ Սարգսյանը հապաղել Վովային Ալիկի փոխարեն նշանակելու հարցում: Թվում է, թե սա պարզ անփութություն է, կամ ընդամենը ԱԱԽ հանդեպ վերաբերմունքի դրսևորում, անտարբերության դրսևորում:
Իրականում սակայն, Սերժ Սարգսյանը երևի թե պատահաբար չէ, որ այդպիսի վերաբերմունք է ցույց տալիս ԱԱԽ հանդեպ: Բանն այն է, որ Հայաստանի ԱԱԽ-ում անձերը արդեն վաղուց է, որ բացարձակապես կարևոր չեն, քանի որ նրանք ընդամենը մարդիկ են, որոնք հավանություն են տալիս մեկ անձի մտքերին կամ ցուցումներին: Առավելագույնը, հավանություն է տրվում անձանց մի խմբի մտքերին ու ցուցումներին, որոնց զգալի մասը ասենք դուրս է ԱԱԽ կազմից:
Իսկ այդ կառույցի քարտուղար նշանակելով Արթուր Բաղդասարյանին, Սերժ Սարգսյանն ընդհանրապես ցույց տվեց, որ ԱԱԽ-ին բացարձակապես լուրջ չի վերաբերում: Բանն այն է, որ Սարգսյանն ինքը եղել է ԱԱխ քարտուղար, ու թերևս գիտակցում է, թե որքան լուրջ կառույց կարող է լինել այն, եթե իշխանությունը համարժեք մոտենա դրա գործունեությանը:
Իսկ Սերժ Սարգսյանին, որ Հայաստանում փորձում է բացարձակորեն մոնոլիտ իշխանություն ձևավորել և դրանում է տեսնում իր իշխանական անվտանգության գլխավոր գրավականը, այդ պարագայում ԱԱԽ`որպես լուրջ կառույց, բացարձակապես պետք չէ: Դա կարող է ընդամենն ավելորդ գլխացավեր առաջացնել Սարգսյանի համար, ով առանց այդ էլ շատ այլ գլխացավերի առիթներ է ունենում:
Այնպես որ ամենևին զարմանալի չէ, որ Սարգսյանը փորձում է շարունակել արժեզրկել ԱԱԽ-ն որպես կառույց: Եվ այդ տեսակետից, նույնիակ ավելի լավ կլինի այն ընդհանրապես վերացնել և չզբաղվել պետական մակարդակի ինքնախաբեությամբ: Բայց, Սարգսյանն իհարկե չի գնա այդ քայլին, քանի որ ԱԱԽ-ն նա ծառայեցնում է մոնոլիտ իշխանության ձևավորման իր մարտավարությանը, ժամանակ առ ժամանակ դրանով բավարարելով զանազան «խոչընդոտների» փառասիրությունը:
Օրինակ, 2008 թվականին Սարգսյանն ԱԱԽ քարտուղարի պաշտոնով «գնեց» Արթուր Բաղդասարյանին, իսկ բոլորովին վերջերս էլ Սարգսյանը ԱԱԽ կազմ ներառելով Գագիկ Ծառուկյանին, «փոխհատուցեց» նրա ներիշխանական հնազանդությունը: