Բրիտանական Financial Times թերթի լրագրողներն եկել են այն եզրակացության, որ Ռուսաստանի Պետդումայի ընտրությունների նախաշեմին ռուսական պետական հեռուստաընկերությունները պարտություն են կրելու համացանցի հետ պայքարում:
Դրա վկայությունը YouTube-ում տեղադրված տեսանյութն էր, որը դիտել է ավելի քան 3,3 միլիոն մարդ, իսկ դաշնային երկու պետական հեռուստաալիքների վերջին լուրերը` 200 հազար ավելի քիչ հեռուստադիտող:
Տեսանյութում պարզ լսվում է, թե ինչպես են երկրպագուները սուլել վարչապետ Վլադիրմիր Պուտինին, երբ վերջինս Ջեֆ Մոնսոնի և Ֆյոդոր Եմելյանենկոյի մարտից հետո բեմ է բարձրացել ռուս մարզիկին շնորհավորելու համար:
«Իշխող «Եդինայա Ռոսիայի» կուսակցության ժողովրդականության անկումը գլխավորապես պայմանավորված է համացանցից օգտնողների թվի աճով»,-ասում են հոդվածի հեղինակները: Նույնիսկ նոյմեբերին թոշակառուների հետ հանդիպման ժամանակ Պուտինն ասել է, որ հեռուստացույց չի դիտում:
Ինչպես գրում է Financial Times-ը, «Ռուսաստանի երկու գլխավոր հեռուսաալիքների» լուրեր դիտողների թիվը վերջին 12 տարիների ընթացքում նվազել է 10-14 տոկոսով:
Պարբերականի կողմից հարցված վերլուծաբանները վստահ են, որ հեռուստատեսության ժողովրդականության անկման պատճառը իր գաղափարական ուղղվածությունն է: «Այն ղեկավարվում է իշխանությունների կողմից, այդ պատճառով երկրի երիտասարդությունը կորցրել է նրա նկատմամբ հետաքրքրությունը»,-բացատրել են պարբերականի զրուցակիցները:
Բացի իշխող կուսակցության քարոզչությունից, «հեռուստաընկերություններն օգտագործվում են անկախ կազմակերպություններին և ընդդիմությանը վարկաբեկելու համար»,-հիշեցնում է Financial Times-ը:
Պարբերականը նաև ընդգծում է, որ Կրեմլը ոչ մի քայլ չի ձեռնարկում համացանցում գրաքննություն մտցնելու համար` չնայած համացանցի օգտվողների թվի աճին: Թերթը Ռուսաստանին համեմատում է Չինաստանի հետ և գալիս է այն եզրակացության, որ ռուս բլոգերները «նախկինի պես կարող են գրել այն, ինչ ուզում են»:
