Շրջակա միջավայրի վերաբերյալ օրենքում փոփոխությունների գլխավոր նպատակը այսօրվա օրենքը միջազգային պայմանագրերին համապատասխանեցնելն է:
Ինչպես այսօր օրենքի փոփոխությունների շուրջ ԱԺ-ում կազմակերպված հասարակական լսումների ժամանակ հայտարարեց Կանաչների միության նախագահ Հակոբ Սանասարյանը, միջազգային պայմանագրերն առաջինը ստորագրողները ստանում են դրամաշնորհ ու ոսկե մեդալ, մինչդեռ հզոր պետությունները այդ պայմանագրերը երկար ժամանակ քննարկում են, հետո որոշում` ստորագրել, թե ոչ:
«Միջազգային պայմանագրերին ՀՀ օրենքների համապատասխանեցումը աշխարհի միակենտրոն կառավարման խնդիր է լուծում»,- ասաց Հ. Սանասարյանը` նշելով, որ այս օրենքը միջազգային կոնվենցիաներից վերցված կտորներ են և պետք է նոր օրենք գրվի:
Անդրադառնալով էկոլոգիական փորձաքննության տրամադրման ժամկետի կրճատմանը (90 օրից մինչև 60 օր)` Հ. Սանասարյանը նշեց, որ նույնիսկ 3 ամսում է մասնագիտական կարծիք ձևավորելը դժվար, և ժամկետի կրճատումը սխալ է:
«Էկոլոգիական փորձաքննությունը երկրի ապագայի խնդիրն է: Ոտքի տակ տրորվելու են Հայաստանի բնությունն ու բնակչությունը: Միջազգային պայմանագրերն իրենցից ի՞նչ են ներկայացնում, մի օր դրանց հերն անիծվելու է»:
Էդիկ Բաղդասարյանի գնահատականով` օրենքում նման հապճեպ փոփոխությունների նպատակն ապօրինությունները կոծկելն է. «Ինչո՞ւ է պետք օրենքը փոփոխել, եթե այն ընդհանրապես չի գործում»:
