Բրիտանական The Daily Mail պարբերականի փոխանցմամբ՝ 4 օր առաջ «անհետացած» արքայազն Էնդրյուն (Յորքի հերցոգ) անսպասելիորեն հայտնաբերվել է Ադրբեջանում։ Նա՝ որպես թագավորական ընտանիքի ներկայացուցիչ, նախորդ շաբաթ մեկնել էր Մերձավոր Արևելքի երկրներ։
Ակնկալվում էր, որ արքայազնը պաշտոնական այցով Կատար պիտի ժամաներ նոյեմբերի 23-ին, մինչդեռ նա այնտեղ ժամանել է միայն նոյեմբերի 27-ին։ Պարզվում է, որ այդ 4 օրը արքայազնը «գաղտնի» այցով գտնվել է Ադրբեջանում։
Բաքվի «Ենի Մուսավաթ» թերթը, վկայակոչելով անվտանգության ծառայության աշխատակիցներից մեկին, հաստատել է Էնդրյուի ադրբեջանական այցը, սակայն աղբյուրն այլ մանրամասներ չի հաղորդել, քանի որ խոսքը գնում է «գաղտնի տեղեկատվության» մասին։
Ավելի վաղ բրիտանական մամուլը բազմիցս գրել էր, որ արքայազնը Ադրբեջանի բիզնես ոլորտում հետապնդում է սեփական շահերը։ Նա, մասնավորապես, Կասպից ծովի ափին հիմնել է էլիտար գոլֆ ակումբ։ Սակայն Բուկինգհեմյան պալատը չի հաստատում այդ ամենը։
Ամեն դեպքում, արքայազն Էնդրյուի կանոնավոր այցերը դեպի Ապշերոն մշտապես քննադատության են ենթարկվում, քանի որ թագավորական ընտանիքի անդամը չպետք է անձնական կապեր հաստատի մարդու իրավունքները ոտնահարող երկրի հետ։