Ինչպես գրում է թուրքական Hurriyet թերթը, հայկական ամենամեծ և ամենաազդեցիկ խմբերից մեկը` Հայ դատի ամերիկյան գրասենյակը, սկսել է մի արշավ, որով կոչ է անում Ներկայացուցիչներիպալատին ընդունել Հայոց ցեղասպանության վերաբերյալ բանաձևը մինչև Կոնգրեսի այս գումարման ժամկետի լրանալը, այսինքն՝ մինչև դեկտեմբերի վերջը:
Թերթը գրում է, որ հայկական լոբբիստական կազմակերպությունները նախկինում էլ են այս բանաձևի օգտին աշխատել, հատկապես՝ ամեն Ապրիլ 24-ից առաջ։ Հայ դատի գրասենյակը հույս ունի, որ բանաձև կանցնի մինչև տարվա վերջ, նախքան իր կոնգրեսական չեմպիոններից մեկը (նկատի ունեն Նենսի Փելոսիին, որն այս ընտրություններից հետո կորցրել է խոսնակի պաշտոնը.– խմբ.) կկորցնի պաշտոնը:
Թերթը նաև հիշեցնում է, որ վերջերս ամերիկահայ հայտնի աստղերը նոր արշավ են սկսել բանաձևի ընդունման համար և Փելոսիից պահանջում են անցկացնել բանաձևը մինչև այս տարվա վերջ:
Թերթը տեղեկացնում է նաև, որ Հայ դատի գրասենյակն արդեն հանդես է եկել համապատասխան հայտարարությամբ: