Ադրբեջանական Turan լրատվական գործակալության փոխանցմամբ՝ այսօր՝ տեղական ժամանակով ժամը 15.00-ին մահացել է օրեր առաջ հարձակման ենթարկված ադրբեջանցի հակաիսլամիստ գրող-հրապարակախոս Ռաֆիկ Թագին։ Նոյեմբերի 19-ին անհայտ անձինք դանակի 6 հարվածներ էին հասցրել նրա թիկունքին ու պարանոցին։
Նշվում է, որ Թագիի առողջական վիճակը կտրուկ վատացել է և նրան ընդհանուր պալատից տեղափոխել են վերակենդանացման բաժանմունք, սակայն բժիշկներին չի հաջողվել փրկել նրա կյանքը։ Դրանով իսկ Թագին Էլմար Հուսեյնովից հետո դարձավ իր մասնագիտական գործունեության համար Ադրբեջանում սպանված երկրորդ լրագրողը։
Հիշեցնենք, որ 2006 թվականին Թագին «Սանաթ» թերթում հրապարակել էր «Եվրոպան և մենք» խորագրով մի հոդված, որում վիրավորական հայտարարություններ էր գործածել իսլամի հասցեին։ Դրանից հետո նա դատապարտվել էր 3 տարվա ազատազրկման։
Այդ հրապարակման համար Իրանի կրոնական գործիչները պահանջել էին պատժել հրապարակախոսին, իսկ տեղի իսլամիստները զանգվածային բողոքի ակցիա էին կազմակերպել՝ սպառնալով սպանել նրան։
Բացի այդ, այս տարվա նոյեմբերի 10-ին www.kulis.az կայքում հրապարակած Իրանի վերաբերյալ իր հոդվածում Թագին քննադատության էր ենթարկել թեհրանյան կղերական ռեժիմը։ Դրա համար էլ կասկածներ կային, որ Իրանը մասնակցություն է ունեցել Թագիի դեմ կատարված մահափորձին, սակայն իրանական կողմը հերքել էր դա։
