Ադրբեջանական APA լրատվական գործակալության փոխանցմամբ՝ Մեծ Բրիտանիայում գործող Կասպյան տեղեկատվական կենտրոնը (Caspian Information Centre) հարցախույզ է անցկացրել Ադրբեջանում՝ պարզելու բնակչության վերաբերմունքը նախագահ Իլհամ Ալիևի հանդեպ։
Հարցախույզն անցկացվել է այս տարվա սեպտեմբերին 1000 մարդու շրջանում։ Հարցախույզի մասնակիցների 95 տոկոսը հայտարարել է, որ աջակցում է Իլհամ Ալիևին, 96 տոկոսը հաջող է համարում Ալիևի վարած արտաքին քաղաքականությունը՝ ընդգծելով, որ վստահում է նրան։
Թեև 79 տոկոսը կարծում է, որ երկրում ընթանում են դրական զարգացումներ, նրանց 40 տոկոսը համարում է, որ երկրում աշխատանք գտնելը դարձել է ավելի բարդ խնդիր։ 23 տոկոսը կարևորում է երկրի քաղաքական կայունությունը, իսկ 15 տոկոսը՝ տնտեսական կարևորությունը։
Հիշեցնենք, որ ներկայումս Ադրբեջանի ղեկավար շրջանակներում լուրջ քննարկումներ են ընթանում 2013 թվականին կայանալիք նախագահական ընտրությունների շուրջ։ Նշվում է, որ այդ ժամանակ երկիրը ցնցումներից զերծ պահելու համար, ինչում իր ազդեցությունն ունի «Արաբական գարունը», Ադրբեջանի նախագահի պաշտոնում կարող է առաջադրվել ոչ թե Իլհամ Ալիևը, այլ նրա կին և տվյալ ժամանակվա վարչապետ Մեհրիբան Ալիևան։
