Իրանական Mehr News լրատվական գործակալության փոխանցմամբ՝ Իրանը հերքել է քիմիական զենքի համար Լիբիային համապատասխան արկեր տրամադրելը։ Իրանի՝ Մարդու իրավունքների գծով բարձրագույն խորհրդի գլխավոր քարտուղար Մոհամեդ Ջավադ Լարիջանին հայտարարել է, որ Իրանը չէր կարող այդպիսի մատակարարումներ իրականացնել Լիբիային.
«Ես ամբողջովին վստահ եմ, որ նմանատիպ հրապարակումների հեղինակն ԱՄՆ-ն է, ինչն իրականացվում է տարածաշրջանում ու աշխարհում իրանատյացության դրսևորման նախագծերի իրագործմանը։ Անկասկած է, որ դա հերթական հնարանքն է, որը կոչված է միջազգային հանրության աչքում Իրանի վրա ցեխ շպրտելուն ու նրան որպես հրեշ ներկայացնելուն»։
Հիշեցնենք, որ երեկ ամերիկյան The Washington Post թերթում հրապարակված հոդվածի համաձայն, ԱՄՆ նախագահ Բարաք Օբամայի վարչակազմը հետաքննում է Իրանի կողմից լիբիական նախկին առաջնորդ Մուամար Քադաֆիին իպրիտ թունավոր նյութով հագեցած հարյուրավոր արկերի տրամադրման հնարավորությունը, ինչը Լիբիան գաղտնի է պահել տասնամյակներ շարունակ։
Ամերիկյան հետախուզության ղեկավարությամբ այս հետաքննությունը սկսվել է այն բանից հետո, երբ այս տարվա հոկտեմբերին Լիբիայում հայտնաբերվեց քիմիական զենքի երկու պահեստ։ Մինչ այդ Լիբիան գաղտնի էր պահել իր տրամադրության տակ այդ սպառազինության առկայությունը։ Հայտնաբերումից հետո այդ պահեստները գտնվում են շուրջօրյա դիտարկման ներքո։
