«Ժողովուրդ» օրաթերթից «Առաջին լրատվական»-ին տեղեկացնում են, որ երեկ Գեղարքունիքի մարզի ընդհանուր իրավասության դատարանում (նախագահող Արթուր Թամրազյան) սկսվել է Գեղարքունիքի մարզպետ, ԲՀԿ-ական Նվեր Պողոսյանի ներկայացրած հայցի քննությունն ընդդեմ «Ժողովուրդի»:
Դատավարության ընթացքում մարզպետ Ն. Պողոսյանի 3 փաստաբանները մեկուկես ժամ փորձում էին դատարանին ու ներկաներին ապացուցել, որ «Ժողովուրդ» օրաթերթն իրավունք չուներ մարզպետի` կաշառք վերցնելու մասին նյութ հրապարակել, քանի որ նա հանրային անձ է:
Ավելին` նրանք դատարանում ասում էին, որ թերթը պարտավոր էր պարզել կաշառքի մասը, նոր տպագրել:
«Ժողովուրդի» ներկայացուցիչ Հակոբ Ճարոյանը բացատրել է, որ թերթը պարտավոր չէր քննություն վարել և պարզել` որտեղ և ինչ հանգամանքներում, ո՞ւմ միջոցով է մարզպետը կաշառք վերցրել:
Թերթը հանդես է եկել ամբիոնի դերում, հրապարակել է Թթուջուր գյուղի դպրոցի քննության մասնակից Աննա Թորոսյանի խոսքերը, որն ասել էր, որ մարզպետին իր մրցակցից գումար է տվել` վարորդի միջոցով:
Օրաթերթը զանգահարել էր նաև մարզպետին` ճշտելու, թե որքանո՞վ են հավաստի տեղեկությունները:
«Այսպիսով, գտնում եմ, որ հայցը ամբողջովին ենթակա է մերժման»,- հայտարարել է Ճարոյանը:
Դատավոր Արթուր Թամրազյանը հայցվորին հարցրել է, թե չի կարծում արդյոք, որ թերթը մեջբերում է կատարել: Մարզպետի փաստաբանները պատասխանել են, թե`ոչ:
Դատավարության ընթացքում, ըստ օրաթերթի, մի քանի հետաքրքիր դրվագներ են արձանագրվել: Երբ օրաթերթի ներկայացուցիչը հետաքրքրվել է` ի վերջո Ն. Պողոսյանը կաշառք վերցրե՞լ է, թե՞ ոչ, նրա փաստաբանները պատասխանել են, թե տեղյակ չեն:
Տարակուսելի պահվածք է դրսևորել նաև Ա. Թորոսյանը: Նա դատարանում հաստատել է իր ասած բոլոր խոսքերը` գյուղի դպրոցի մրցույթի մասին, իսկ երբ հասավ մարզպետի` վարորդի միջոցով վերցրած 3000 ԱՄՆ դոլար կաշառքի դրվագին, սկսել է չհիշել:
Նա վախվորած հայացքով նայել է այս ու այն կողմ` հայտարարելով, որ մարզպետի կաշառք վերցնելու մասին ինքը ոչինչ չգիտի, ընդամենը լսել է գյուղի «ասեկոսեներից»:
Այդ ժամանակ օրաթերթը միջնորդել է դատարանին` լսել Աննայի ձայնագրությունը:
Դատարանը բավարարել է միջնորդությունը:
Հրապարակվել է ձայնագրությունը, որտեղ Աննան ասում է, իր ամուսնու հետ գնացել է մարզպետի վարորդի մոտ, որը Վահան գյուղից է, ով ասել է, որ այդ գործն արդեն չի լինի, քանի որ մյուս մասնակցից վերցրել է 3000 ԱՄՆ դոլար ու տվել մարզպետին:
«Որ իմանայի դուք էիք, չէի անի այդ գործը»,- ըստ Աննայի` ասել է մարզպետի վարորդը:
Այս ամենից հետո դատավոր Արթուր Թամրազյանը հետաձգել է դատական լսումը մինչև դեկտեմբերի 5-ը ժամը 15.00-ն:
Այդ օրը հայցվող կողմն ու դատարանը հարցեր կտան օրաթերթին:
