ՀՀ ԱԻ նախարարությունը «Առաջին լրատվական»-ին տեղեկացնում է, որ նոյեմբերի 15-ին ԱԻ նախարար Արմեն Երիցյանն ընդունել է ՀՀ-ում Ֆրանսիայի արտակարգ և լիազոր դեսպան Անրի Ռենոյին և Վրաստանում Ֆրանսիայի Հանրապետության դեսպանատան անվտանգության հարցերով կցորդ Ստեֆան Ռոպերին։
Ա. Երիցյանը հույս է հայտնել, որ ֆրանսիացի գործընկերների հետ համագործակցությունը շարունակական կլինի։
Դեսպան Ռենոն նշել է, որ այս ամառ ԱԻ նախարարի այցը Ֆրանսիա ևս մեկ անգամ ապացուցեց, որ Արտակարգ իրավիճակների նախարարությունն իրական համագործակցողներից է։
«Դատելով մեր նախորդ հանդիպումներից` կարող եմ ասել, որ մեր համագործակցությունը ոչ միայն շարունակական պիտի լինի, այլ նաև պիտի ընդարձակվի` ներառելով նոր ոլորտներ և ուղղություններ», – ասել է դեսպանը։
Նախարարը ներկայացրել է նախարարության գործունեության հիմնական ուղղությունները` տարածաշրջանում առաջինը Հայաստանն է ստեղծել Աղետների ռիսկի նվազեցման ազգային պլատֆորմ, մշակել ԱՌՆ ազգային ռազմավարությունը, Արտակարգ իրավիճակների նախարարությունում գործում է Ճգնաժամային կառավարման կենտրոն, որի ստեղծման և կայացման գործում կա նաև ֆրանսիացի գործընկերների նեդրումը։
Ֆրանսիայի և Հայաստանի համագործակցության կարևոր ուղղություններից է կամավոր հրշեջ-փրկարարների համակարգի ստեղծումը Հայաստանում։
«Տեսնելով Ֆրանսիայում հասարակական հիմունքներով աշխատող հրշեջ-փրկարարների փորձը` այսօր փորձում ենք նման համակարգ ներդնել Հայաստանի Շիրակի և Լոռու մարզերում։ Կարծում եմ, կամավոր հրշեջ-փրկարարական համակարգի ֆրանսիական տարբերակը լավագույններից է, և մենք շատ բան ունենք սովորելու այդ ուղղությամբ», – նշել է նախարարը։
ԱԻ նախարարի ուղեկցությամբ հյուրերը շրջել են Ճգնաժամային կառավարման կենտրոնում, ծանոթացան դրա տեխնիկական հնարավորություններին և աշխատանքային պայմաններին։
