Բրիտանացի գրող Սալման Ռուշդին Facebook սոցցանցի ղեկավարությունից իրավունք ստացել է սոցիալական ցանցի էջում կրկին իր անունը օգտագործել:
Ինչպես հայտնում է France-Presse գործակալությունը, գրողը, որի ամբողջական անունը անձնագրում Ահմեդ Սալման Ռուշդի է, հանգստյան օրերին զրկվել էր սոցիալական ցանց մուտք ունենալու իրավունքից: Այն բանից հետո, երբ Ռուշդին Facebook-ի ղեկավարությանն է ուղարկել իր անձնագրի պատճենը, նրան հայտնել են, որ նա պետք է սոցցանցում կիրառի իր անունը` Ահմեդ, որը Սալմանից առաջ է գտնվում: Գրողի մուտքը իր հաշիվ արգելափակվել է, իսկ սոցցանցի էջում նա դարձել է Ահմեդ Ռուշդի:
Արդյունքում գրողը Twitter-ի օգնությամբ դիմել է Facebook-ի հիմնադիր Մարկ Ցուկենբերգին` պահանջելով իրեն վերադարձնել իր անունը, սակայն պատասխան չի ստացել: Այդ ժամանակ Ռուշդին սոցցանցի ղեկավարությունից պահանջել է իրեն վերադարձնել Սալման անունը, քանի որ ընթերցողները ամբողջ աշխարհում նրան ճանաչում են այդ անունով: Արդյունքում Facebook-ի ղեկավարությունը հանձնվել է` Ռուշդիին վերադարձնելով Սալման անունը կիրառելու հնարավորությունը: Բացի այդ, ընկերությունը ներողություն է խնդրել գրողից:
Սալման Ռուշդին ծնունդով Բոմբեյից է և ապրում է Մեծ Բրիտանիայում կամ ԱՄՆ-ում: Համաշխարհային փառք է ձեռք բերել 1989 թվականին լույս տեսած «Սատանայական բանաստեղծություններ» գրքի շնորհիվ: Շատ մուսուլմաններ այդ վեպն անվանել են հայհոյական, իսկ Իրանի հոգևոր առաջնորդ այաթոլլահ Խամենեին ֆեթվա է արձակել, որով գրողի սպանությունը համարվում է բարի գործ:
