РИА Новости-ի փոխանցմամբ՝ ամերիկյան CBS հեռուստաալիքը նոյեմբերի 6-10-ը երկրում հարցախույզ է անցկացրել 1182 անձանց շրջանում՝ պարզելու հասարակության տրամադրվածությունն արտաքին քաղաքականության մի շարք կարևոր խնդիրների շուրջ։
Հարցախույզի արդյունքները վկայել են, որ հարցման ենթարկված 10 ամերիկացիներից 7-ը դեմ է Վաշինգտոնի այն փորձերին, որոնք ուղղված են բռնապետական ռեժիմները ժողովրդավարականի վերածելուն։ Հարցվածների կեսը նշել է, որ ԱՄՆ-ը չպետք է մասնակցեր Լիբիայում ռազմական հակամարտությանը։
Դրա հետ մեկտեղ, ամերիկացիների 67 տոկոսը կողմ է Վաշինգտոնի կողմից ուժի գործադրմանն այնպիսի երկրներում, ինչպիսիք են Պակիստանն ու Եմենը, ուր ենթադրաբար թաքնվում են ահաբեկիչները։ Դրան դեմ է հարցվածների 22 տոկոսը։
Հարցվածների 55 տոկոսը վստահ է, որ Իրանի միջուկային ծրագրի խնդիրը կարող է լուծվել դիվանագիտական ճանապարհով։ Միայն 15 տոկոսն է կարծում, որ ԱՄՆ-ը պետք է ռազմական գործողություններ սկսի Իրանի դեմ, իսկ 17 տոկոսն էլ Իրանին ընդհանրապես սպառնալիք չի համարում։
Ինչ վերաբերում է Հյուսիսային Կորեայի միջուկային ծրագրին, ապա հարցվածների 65 տոկոսը կարծում է, որ այն հնարավոր է լուծել դիվանագիտական ճանապարհով։ 16 տոկոսն անհրաժեշտ է համարում ԱՄՆ կողմից ռազմական գործողությունների իրականացումը, 12 տոկոսն էլ Փհենյանին չի դիտարկում որպես սպառնալիք։
Հարցվածների 61 տոկոսը ԱՄՆ-ի համար բացասական է գնահատում Չինաստանի տնտեսական աճն ու էքսպանսիան, 67 տոկոսը կարծում է, որ Պեկինն ուղղակի ռազմական սպառնալիք է ներկայացնում ԱՄՆ համար։
Ամերիկացիների 42 տոկոսն աջակցում է անկախ պաղեստինյան պետության ստեղծմանը, 34 տոկոսը դեմ է դրան։
Հարցվածների 42 տոկոսը կարծում է, որ ԱՄՆ-ն ու նրա դաշնակիցները կհաղթեն ահաբեկչության դեմ պատերազմում, սակայն նույնքանն էլ կարծում է, որ այդ պատերազմում հաղթողներ չկան։ Միայն 9 տոկոսն է կարծում, որ այդ պայքարում հաղթում են ահաբեկիչները։
Հարցախույզի մասնակիցներից ընդամենը 25 տոկոսն է դրականորեն տրամադրված իսլամի նկատմամբ, իսկ 32 տոկոսը՝ բացասական։
Հիշեցնենք, որ Պենտագոնի ղեկավար Լեոն Փանեթան զգուշացրել էր Իրանին ռազմական հարված հասցնելու անկանխատեսելի հետևանքների մասին։
