Լիբանանահայերի և քուրդ բնակչության միջև Բուրջ Համուդ թաղամասում լարվածություն չկա: Արդեն մեկ շաբաթ է, ինչ լիբանանյան մամուլը շահարկում է այն հարցը, որ Բուրջ Համուդ ամենահայաշատ թաղամասի հայերը ցանկանում են թաղամասից վտարել քուրդ բնակչությանը, սակայն այս լուրերը շահարկումներ են Լիբանանի հակաիշխանական լրատվամիջոցների կողմից: Այս մասին «Առաջին լրատվական»-ին տեղեկացրեց լիբանանահայ բանաստեղծ, հրապարակախոս Սագօ Արեանը` մեկնաբանելով Բուրջ Համուդ թաղամասում ստեղծված իրավիճակը:
Տեղեկացնենք, որ այս թաղամասը Բեյրութի ամենահայաշատ թաղամասերից մեկն է, որտեղ բնակչության մոտ 80 %-ը հայեր են: Հայերն այս թաղամասում ապրում են իրենց ընտանիքների հետ և կարևորում իրենց ընտանիքների ապահովությունն ու անվտանգությունը՝ անկախ նրանից՝ պատերազմական դրություն է, թե խաղաղ:
Ս. Արեանը նշեց, որ 10 օր առաջ ընդհարում էր եղել Բուրջ Համուդի ծայրամասերից մեկում հայ և քուրդ երիտասարդների միջև: «Քուրդ բնակչությունը Բուրջ Համուդում աշխատավոր դասակարգին է պատկանում և չի փայլում պահվածքով: Շրջանի հայ, լիբանանցի բնակչությունը դժգոհ էր երիտասարդների պահվածքից: Երբեմն գալիս էին հայկական թաղամասեր, ու այդպես մի շաբաթ առաջ ընդհարումներ տեղի ունեցան երիտասարդ տղաների միջև»,- մանրամասնեց լիբանանահայ հրապարակախոսը` հավելելով, որ իրադարձության ընթացքն այլ կերպ թարգմանվեց մամուլի կողմից, մամուլը շահարկեց այս թեման՝ նշելով, որ հայերը փորձում են թաղամասից վտարել քրդերին:
Ըստ նրա`սա էր պատճառը, որ բողոքի ալիք բարձրացավ, բայց մտահոգիչն այն է, որ լիբանանյան մամուլը շահարկեց այս թեման տարբեր նպատակներով: Ինչպես տեղեկացրեց Ս. Արեանը, տեղական հայկական մարմինները հաղորդագրություն հրապարակեցին լիբանանյան մամուլում, որպեսզի հանրությունն իմանա, թե իրականում ինչ է կատարվում: Նշենք նաև, որ քաղաքապետարանը պահանջում է, որ բոլոր անօրինական բնակություն հաստատած անձինք գրանցվեն:
«Կան մարդիկ, որ պարզապես փորձանք են խաղաղ բնակչության գլխին: Մի արշավ սկսվեց, որ այդ մարդկանց բնակությունն օրինական դառնա: Այսօր դրությունը խաղաղ է, տհաճն այն է, որ լիբանանյան հակաիշխանական մամուլի կողմից շահարկվում է, թե հայերը քրդերին վտարում են: Հայերը ոչ ոքի չեն վտարում, հայերն ուզում են, որպեսզի իրենց բնակավայրն ապահով լինեն, իրենց կողքին ապրող մարդիկ լինեն օրինական, հարգեն հարևաններին, խնդիրներ չստեղծեն, տհաճ ընդհարումներ չստեղծվեն: Հայկական ընտանիքների սրբությունը և ապահովությունը կարմիր գիծ է՝ անկախ նրանից՝ երկրում խաղաղություն կլինի, թե պատերազմ»,- ընդգծեց Սագօ Արեանը:
