Սևամորթ գործարար Հերման Քեյնը, որը համարվում է հանրապետական կուսակցությունից ԱՄՆ նախագահի հավանական թեկնածուներից մեկը, կասկածվում է սեքսուալ ոտնձգություններ կատարելու մեջ: Այս մասին հոկտեմբերի 30-ին հաղորդում է Politico կայքը` հղում անելով սեփական աղբյուրներին:
Ինչպես պարզվում է` Ռեստորանների ազգային ասոցիացիայի երկու նախկին աշխատակցուհիներ հաճախ են բողոքել իրենց գործընկերներին Քեյնի «անհարիր պահվածքից»: Հենց վերջինիս վարքագիծն է, ըստ նրանց, պատճառ դարձել, որ լքեն աշխատանքը: Կանայք հեռացել են աշխատավայրից` ստանալով դրամական փոխհատուցում ու ստորագրելով մի փաստաթուղթ, որով պարտավորվել են չհրապարակել իրենց հեռացման պատճառը:
Հիշեցնենք, որ Քեյնը 1990-ականներին գլխավորել է ասոցիացիան: Կանանց անունները չեն հրապարակվում` ելնելով վերջիններիս անվտանգությունից:
Քեյնը, ինչպես հաղորդում է Associated Press գործակալությունը, հերքում է իր հասցեին հնչող մեղադրանքները: Նա հրաժարվել է այս հարցի շուրջ մեկնաբանություններից` ընդգծելով, որ ԶԼՄ-ները չեն ներկայացնում իրենց ասածի ուղղակի ապացույցներ: Քեյնի ներկայացուցչի խոսքով`լրատվամիջոցներում սպրդած հայտարարությունը «անհիմն հարձակում է անհատի անձնական կյանքի վրա»:
Հերման Քեյնը ժամանակին եղել է Godfather’s Pizza ցանցի գլխավոր տնօրենը, ինչպես նաև բարձր պաշտոններ է զբաղեցրել Coca-Cola և Burger King ընկերություններում: Բացի այդ` նա վարել է իր սեփական ռադիոշոուն:
2011 թ. մայիսին գործարարը հայտարարեց, որ պատրաստվում է մասնակցել 2012 թ. կայանալիք ԱՄՆ նախագահական ընտրություններին:
Դեմոկրատական կուսակցության թեկնածուն ներկայիս նախագահ Բարաք Օբաման է:
