«Նաիրիտ» գործարանի վերագործարկման և արդիականացման համար ԵվրԱզԷՍ հիմնադրամից 400 մլն դոլարի վարկ հատկացնելու վերաբերյալ ՌԴ կառավարության որոշման մասին լուրերը եթե անգամ ճիշտ լինեն և վարկն իսկապես հատկացվի, միևնույն է, «Նաիրիտը» կրկին վնասով կաշխատի: «Առաջին լրատվական»-ի հետ զրույցում նման գնահատական տվեց «Նաիրիտի» նախկին տնօրեն Գագիկ Ներսիսյանը:
Նա պարզաբանեց, որ նախ՝ կաուչուկի նման պահանջարկ չկա, իսկ եթե պետք է գործարանն իր արդյունաբերական ծավալների 10%-ի չափով աշխատի, քանի որ ացետիլենային մեթոդով այն չի կարող ավելին անել, նշանակում է, որ վնասով է լինելու՝ անկախ թե կաուչուկի գինն ինչքան է բարձրացել, իսկ եթե ծավալը մեծացնեն (հայտնի չէ՝ ինչ հնարավորություններից ելնելով) կաուչուկի այդ պահանջարկը չի լինելու:
«Անհնար է «Նաիրիտն» աշխատացնել իր ծավալներին համապատասխան, եթե չունենք երկաթուղային բեռնափոխադրումներ, իսկ դա չկա արդեն մոտ 16-17 տարի: Դա նշանակում է, որ երբեք հնարավոր չի լինի բերել համապատասխան քանկությամբ հումք, եթե անգամ բութադիենային տեխնոլոգիան կիրառեն ու փորձեն այդպես կաուչուկ արտադրել»,- ասաց Գ. Ներսիսյանը ու հավելեց. «Ինձ թվում է՝ սա ընդամենը խաղ է, այդ փողը ուզում են մտցնեն ու հանեն, որպեսզի ժողովրդի պարտքը տան, բանկերի փողերը տան ու վերջ: Դրանով կավարտվի «Նաիրիտի» պատմությունը»:
Գ. Ներսիսյանի խոսքով՝ ոչ մի մեքենայով հնարավոր չի անհրաժեշտ քանակի բութադիեն բերել ու գործարանն աշխատացնել, իսկ երկաթուղային փոխադրումների ճանապարհը Բաքվի գիծն էր: Նույնիսկ եթե Աբխազիայի երկաթուղին բացվի, կրկին հնարավոր չի լինի հումք բերել, որովհետև Աբխազիան մարդատար փոխադրումների համար է նախատեսված:
Միաժամանակ, Գ. Ներսիսյանը նշեց, որ գործարանի կառավարման տեսակետից խնդիր առանձնապես չկա, ֆինանսական կառավարիչ միշտ էլ կգտնվի, եթե փող լինի, իսկ տեխնոլոգիական կառավարումը կարող են անել:
