ԱՄՆ պաշտպանության փոխնախարար Քլիֆֆորդ Սթենլին հրաժարական է տվել իր շուրջ տարվող հետաքննության ֆոնին: Այս մասին ասվում է Պենտագոնի հաղորդագրության մեջ:
Ինչպես հաղորդում է Associated Press-ը, ծովային հետևակի նախկին գեներալ Սթենլին, որը փոխնախարարի պաշտոնում նշանակվել է 2010 թ. փետրվարին, կլքի այդ պաշտոնը երկու շաբաթվա ընթացքում: Պենտագոնը հավաստիացնում է, որ հրաժարականի որոշումը նա ինքնուրույն է կայացրել, և այն կապ չունի նրա դեմ տարվող հետաքննության հետ:
Այս տարվա ամռանը մի քանի անանուն բողոք էր ներկայացվել առ այն, որ Սթենլին վիրավորանք է հասցրել իր ենթականերին, ոչ արդյունավետ կերպով ծախսել է միջոցները, թանկ և ոչ պիտանի պայմանագրեր է կնքել:
Պենտագոնի հայտարարության մեջ ասվում է, որ Սթենլին փորձել է իր աշխատանքը կատարել լավագույն ձևով, և դա կշարունակի նրա հաջորդը: Առայժմ նոր փոխնախարարի անունը հայտնի չէ:
