ԱՄՆ Ջորջիա նահանգի Ատլանտա քաղաքի բնակիչը փորձել է դուրս գալ ինքնաթիռից, երբ վերջինս գտնվում էր ավելի քան 9 կմ բարձրության վրա: Ինչպես հաղորդում է The Daily Mail պարբերականը, դեպքը տեղի է ունեցել մի քանի օր առաջ Լաս Վեգաս-Ատլանտա չվերթ իրականացնող օդանավում: 60-ամյա Ռիչարդ Ջոել Հարբերը թռիչքից մեկ ժամ հետո ինչ-որ պատճառով որոշել է դուրս գալ ինքնաթիռից: Նա փորձել է բացել թևի վրայի վթարային ելքի դուռը, սակայն շփոթված ուղևորները խանգարել են նրան:
Արդյունքում ինքնաթիռը ստիպված է եղել վերադառնալ օդակայան: Վայրէջքից հետո Հարբերին հանձնել են իրավապահ մարմիններին: Ավելի ուշ նրան ազատ են արձակել և արգելել օդանավով ճամփորդել այնքան ժամանակ, քանի դեռ չի որոշվել նրա դեմ կիրառվելիք պատիժը:
