Լիբիայի նախկին առաջնորդ Մուամար Քադաֆին «սարսափելի բաներ» է արել, բայց նույնիսկ նա արժանի չէր, որ ամբողջ աշխարհում տարածվեին նրա կյանքի վերջին րոպեների կադրերը, որտեղ գնդապետին բռնած լիբիացիները ծաղրում են նրան: Այս մասին NBC հեռուստաալքին տված հարցազրույցում հայտարարել է ԱՄՆ նախագահ Բարաք Օբաման:
«Ես կարծում եմ՝ դա այն չէ, ինչը մենք պետք է վայելենք: Գոյություն ունեն մահացածների նկատմամբ պատշաճ վերաբերմունքի որոշակի կանոններ, նույնիսկ եթե նրանք սարսափելի բաներ են կատարել»,- ասել է Օբաման:
ԱՄՆ նախագահը նկատել է, որ հենց այդ նպատակով Սպիտակ տունը չհրապարակեց մահացած Բեն Լադենի լուսանկարները կամ նրա մարմինը ցուցադրող տեսանյութերը:
Մյուս կողմից Օբաման նշել է, որ Քադաֆիի օրինակը կարող է ուսուցողական լինել աշխարհի մյուս բռնապետերի համար:
«Դուք երբեք չեք ցանկանա տեսնել այնպիսի մահ, ինչպիսին նա տեսավ, սակայն ես կարծում եմ, որ դա (տեսանյութը) ամբողջ աշխարհի բռնապետերի համար ակնհայտ ուղերձ է առ այն, որ մարդիկ ցանկանում են ազատ ապրել»,- ավելացրել է Օբաման: