Թուրքական Hürriyet թերթի փոխանցմամբ՝ Վանի երկրաշարժի հետևանքների արդյունավետ վերացման համար Թուրքիան գրավոր դիմել է ավելի քան 30 երկրների օգնությանը, ովքեր ավելի վաղ հայտնել էին Թուրքիային օգնելու իրենց պատրաստակամության մասին։ Դրանց թվում շոշափվում է նաև Իսրայելի անունը (մինչդեռ Հայաստանին դիմելու մասով ոչինչ գրված չէ)։
Նշվում է, որ երեկ Վանում տեղի ունեցած հերթական ցնցումներից հետո Թուրքիային օգնություն ցուցաբերելու պատրաստակամություն հայտնած առաջին երկրներից մեկը եղել է Իսրայելը, որի նախագահ Շիմոն Պերեսը զանգահարել է Թուրքիայի նախագահ Աբդուլլահ Գյուլին։ Բացի այդ, երեկ երեկոյան Թուրքիայի վարչապետ Էրդողանին զանգահարել է նրա իսրայելցի գործընկեր Բենիամին Նեթանյահուն և օգնություն առաջարկել։
Իսրայելից բացի, Թուրքիան օգնություն է խնդրել 30 երկրներից։ Խոսքը հիմնականում վրանների, հավաքովի տների և շինանյութի տրամադրման մասին։ Հյուսիսային Իրաքի Քրդական Ինքնավարության ղեկավարությունը Թուրքիային հատկացրել է 1 միլիոն դոլար, Ճապոնիան՝ 30 միլիոն իեն (մոտ 400,000 դոլար), Մակեդոնիան՝ 100,000 եվրո։
Վերջին տվյալներով՝ Վանի նահանգում տեղի ունեցած ավերիչ երկրաշարժի զոհերի թիվը հասել է 459-ի, իսկ վիրավորներինը՝ 1352-ի։
