Հոկտեմբերի 27-ի նիստում կառավարությունը նախատեսում է մերժել ԱԺ պատգամավոր Գագիկ Մինասյանի ներկայացրած առաջարկությունները, որոնցով պետք է փոփոխություններ արվեն «Ավտոտրանսպորտային միջոցների օգտագործումից բխող պատասխանատվության պարտադիր ապահովագրության մասին» ՀՀ օրենքում:
Գ. Մինասյանն առաջարկում է ապահովագրական ընկերությունների կողմից կնքված ԱՊՊԱ պայմանագրերով նախատեսված ընդհանուր ապահովագրավճարների 2011 թ. համար նախատեսված մասի 15%-ը 2012 թ. առաջին եռամսյակի ընթացքում փոխանցել երաշխավորման ֆոնդ, ինչն, ըստ էության, ապահովագրական ընկերությունների համար երաշխավորման ֆոնդ լրացուցիչ վճարներ կատարելու պարտավորություն է:
Կառավարությունը կարծում է, որ նախագծի ընդունումը կարող է խեղաթյուրումներ առաջացնել ֆինանսական շուկայում` բացասական ազդակներ հաղորդելով ՀՀ ապահովագրական շուկայում ներդրումներ կատարելու ցանկություն ունեցող արտաքին ներդրողներին, քանի որ ընթացիկ տարվա համար արդեն իսկ սահմանված «խաղի կանոնների» փոփոխությունը վատ նախադեպ կհանդիսանա ոլորտի հետագա գործունեության և կայուն զարգացման տեսանկյունից:
Գործադիրը նաև առաջարկում է ապահովագրական ընկերությունների համար պարտադիր պահանջ սահմանել հասարակությանը ԱՊՊԱ պոլիսները էլեկտրոնային կարգով վաճառքի հնարավորություն ընձեռելը, ինչը կնվազեցնի մատուցվող ծառայությունների ծախսերը` հետևաբար և բեռնվածության ցուցանիշը, ինչպես նաև քննարկել ԱՊՊԱ շուկայում գերիշխող դիրք (30% և ավելի) ունեցող ապահովագրական ընկերությունների համար երաշխիքային հիմնադրամին վճարվող գումարների չափի համար ավելի բարձր գործակցի կիրառման հարցը: Վերջինս հիմնավորվում է այն փաստարկով, որ շուկայում գերիշխող դիրք ունեցողների համար համակարգային ռիսկը հարաբերականորեն բարձր է, հետևաբար նույն չափի վճարների կատարումը տարբեր համակարգային ռիսկ ունեցող ընկերությունների կողմից կարող է խեղաթյուրում մտցնել:
